Hai dous anos os e as estudantes, docentes e profesionais da conservación e a restauración e doutras disciplinas acadaron un obxectivo que viñan procurando dende había tempo. Que as ensinanzas artísticas superiores se integrasen no Sistema Universitario. O Real Decreto 1614/2009 de 26 de outubro permitía que os estudos de ciclo superior de Música, Deseño, Artes Plásticas, Deseño ou Conservación e Restauración se incorporasen ao ensino universitario, con categorías de grao e postgrao, e outras vantaxes, tanto para os centros, os alumnos e os docentes, como salienta unha Plataforma creada co obxectivo de reivindicar esta condición.
A sentencia devólveos á súa condición previa de estudos técnicos superiores, equiparables legalmente aos graos e postgraos universitarios, pero non integrados no sistema universitario
Porén, unha recente sentencia do Tribunal Supremo, que admitiu un recurso da Universidade de Granada contra o ordenamento das ensinanzas artísticas superiores, devólveos á súa condición previa de estudos técnicos superiores, equiparables legalmente aos graos e postgraos universitarios, pero non integrados no sistema universitario, e con meirandes dificultades para que os alumnos e docentes vexan recoñecida esta condición á hora de solicitar bolsas, Erasmus ou residencias universitarias. Reclaman que non é unha simple cuestión de "nomenclatura" e que as diferenzas son importantes.
Dúas promocións da Escola Superior de Conservación de Bens Culturais de Galicia xa teñen iniciado o Grao en Conservación e Restauración, contemplado no decreto impugnado, e cursan estudos adaptados ao sistema de créditos ECTS como esixiu no seu momento a Xunta de Galicia. Agora, a súa situación, coma a de moitos outros, queda nun limbo.
Os alumnos de Conservación sairán este mércores ás rúas de Pontevedra a partir das 17 horas para informar os cidadáns da situación actual dos seus estudos
Por estes motivos, os alumnos de Conservación sairán este mércores ás rúas de Pontevedra a partir das 17 horas para informar os cidadáns da situación actual dos seus estudos e para obter o maior número posible de sinaturas en apoio á entrada no Espazo Europeo de Educación Superior. Supón, ademais, a defensa da profesión de conservador-restaurador, indican, "unha profesión esixente, que implica aplicar un coidado método de diagnose e tratamento". "Ninguén diría que o santuario da Peregrina, o castro de Baroña, o Pórtico da Gloria, a obra gráfica de Castelao, as fotos de Pacheco ou as pallozas do Piornedo sexan algo secundario. Por que os nosos estudos han de ficar nun nivel inferior?", denuncian.