É ben coñecida a riqueza da fauna existente, sobre todo no que respecta ás aves, no parque das Illas Atlánticas, que abrangue as illas Cíes, Ons, Sálvora e Cortegada, onde existen multitude de zonas de cría, pousadoiros ou áreas de alimentación. O parque vén de poñer en marcha unha aplicación para dispositivos android coa que calquera persoa pode rexistrar avistamentos de aves na zona, contribuíndo a crear unha base de datos colaborativa.
A aplicación, SightBirds, funciona como caderno de campo cuxos datos se poden poñer en común co resto de usuarios e usuarias, e permite inserir información sobre familia, especie, sexo, idade, data, localización, condicións meteorolóxicas, mareas e outros comentarios. Os usuarios e usuarias da app tamén poden interactuar entre eles e elas, seguir os seus perfís, e enviar mensaxes aos outros afeccionados e afeccionadas ao birdwatching ou birding. Así mesmo, incorpora unha opción de xeoposicionamento para localizar os lugares nos que se produciu o avistamento das aves. A iniciativa conta tamén cunha web na que se poden incorporar os datos das observacións e que inclúe tamén unha guía de aves.
As illas acollen as maiores colonias de cría da gaivota patiamarela, que supera as 31.000 parellas, o que representa máis do 10% da poboación total e o núcleo máis importante do mundo. Tamén é moi importante a presenza do corvo mariño cristado, do que poden existir 2.000 parellas, cantidade que supón un 70% da poboación ibérica. Igualmente, pódense atopar poboacións de gaivota escura, paíño pequeno, furabuchos balear, arao dos cons ou de corvo mariño grande. A avifauna non mariña de cantil é moi interesante e lles confire unha gran significación ecolóxica ás illas de carácter oceánico no humanizado contorno das Rías Baixas, malia que os efectivos de todas as especies son escasos e varias delas se atopan xa en situación crítica: falcón peregrino, pomba das rochas, andoriñón real, choia biquivermella, gralla pequena ou corvo grande.