0 Gardados para despois

Os reitores galegos rexeitan na Xunta a "inxustiza social" da suba das taxas

David LombaoDavid Lombao | @davidlombao


José Ignacio Wert e Jesús Vázquez non contan coas universidades galegas para subir as taxas. Os tres reitores trasladáronlle este mércores ao conselleiro de Educación o que viñan dicindo por separado dende que o Goberno central fixo pública a súa intención de consagrar tamén o ensino superior no altar do control do déficit. Sentados á mesma mesa que Vázquez, Xosé Luis Armesto (A Coruña), Juan Casares (Santiago) e Salustiano Mato (Vigo) deixáronlle claro ao máximo responsable das institucións educativas galegas o seu desacordo co incremento das taxas. En caso de que non exista un veto total á suba, a aposta é que esta sexa "mínima", nomeadamente, que non exceda o Índice de Prezos ao Consumo (IPC).

É precisamente o IPC como un dos indicadores fundamentais do "nivel de vida" da cidadanía o que, en opinión dos reitores, debe ser fundamental á hora de establecer as taxas universitarias. Nesta liña, o reitor vigués ve "unha inxustiza social intolerable" que o novo incremento se aplique botando man de "prezos medios" para cada carreira, de xeito que en todo o Estado "as carreiras vallan o mesmo". Desta maneira, "onde hai máis nivel de vida pagarán menos e onde hai menos poder adquisitivo, como é o noso caso, pagarán moitísimo máis". Esta cuestión, di Salustiano Mato, é precisamente a que estará sobre a mesa da negociación que, din os tres responsables das institucións académicas, a Xunta se comprometeu a entablar co Ministerio de Educación. "A loita é que o custo real do que vale a matrícula se calcule en función dos parámetros de Galicia, do nivel de vida", abonda. "Se é así estará arredor do 13 ou 14% do que vale a carreira", e non chegará en ningún caso ao 25% ata o que permite chegar o Ministerio.

"A loita é que o custo real do que vale a matrícula se calcule en función dos parámetros de Galicia, do nivel de vida"

Tamén o reitor coruñés coida que o "xusto e razoable" é que o "custe real" das carreiras ao que alude o Executivo central sexa calculado en función do nivel de vida de cada autonomía. Neste sentido, Armesto sinala que dende a Xunta se "coincidade" nesta necesidade, polo que tentará "interpretar" o Real Decreto de maneira que sexa posible "minimizar o aumento de taxas". Estas negociacións, engade o reitor de Santiago, poderían prolongarse ata "un mes", xa que a norma aínda debe pasar polo Congreso dos Deputados e sobre ela terán "moito que dicir" órganos como o Consello de Universidades e a Comisión de Política Universitaria. "Esperamos que para entón se aclaren as dúbidas, se corrixan aspectos que entendemos interpretables e moi discutibles e, polo tanto, a nosa esperanza está en que se escoiten as partes interesadas no tema", sinala Casares.

"Erros" e "mala redacción" na normativa do Ministerio

Mentres no exterior de San Caetano delegados dos sindicatos educativos e representantes da Liga Estudantil Galega se manifestaban contra os recortes os reitores advertían de que a suba das taxas non é o único elemento do Real Decreto que suscita a súa discrepancia. Neste sentido, Xosé Luís Armesto explica que non é viable medir "a dedicación dos docentes" en créditos ECTS -os implantados coa adaptación ao Espazo Europeo de Educación Superior-. Este método "mide o esforzo do estudante en conseguir un cŕedito, que son 25 horas, e non mide a dedicación do profesor. Na mesma liña, Salustiano Mato advirte de que este non é un rexeitamento a incrementar o traballo do profesorado universitario, senón a un decreto con "erros técnicos e mala redacción".

Os reitores rexeitan que os bolseiros teñan que ter "un rendemento superior" ao resto do alumnado para poderen estudar

Do mesmo xeito, e aínda que polo momento o reducen á categoría de "globo sonda", os reitores galegos están tamén alerta ante a posibilidade de que o Ministerio endureza as condicións para acceder ás bolsas universitarias. Tras as declaracións lanzadas por Wert neste sentido, Armesto, Casares e Mato subliñan que este precepto "aínda non está por escrito", se ben o reitor da Coruña xa advirte de que sería "inxusto" que quen é bolseiro deba ter un rendemento "superior" que o resto do estudantado. "En calquera caso, entendemos que son opinións, declaracións globo sonda que non están plasmados en ningunha decisión política", salienta.

Coa túa achega fas posible que sigamos publicando novas coma esta.

"Conselleiro, dimite, o ensino non te admite"

A xuntanza dos reitores co conselleiro de Educación celebrouse mentres no exterior de San Caetano os sindicatos educativos e a Liga Estudantil Galega rexeitaban a suba das taxas e, en xeral, os recortes educativos da Xunta e do Estado con consignas como "conselleiro, dimite, o ensino non te admite". Malia ás promesas de negociación lanzadas dende o Goberno galego os representantes sindicais amosan escasa confianza en que o gabinete de Alberto Núñez Feijóo mude o rumbo. "A súa credibilidade é nula", di Anxo Louzao, da CIG Ensino, "se a tivese non actuaría como un servil vasalo dos mandatos de Madrid" tanto no ámbito universitario como no ensino medio, no que advirte posibles "trampas" á hora de non aplicar o incremento de ratios de alumnos por aula: "pode agrupar alumnos de distintos niveis", asegura.

As protestas contra a política educativa dos gobernos do PP continuarán o vindeiro día 10, coa folga estudantil contra o incremento dos prezos das matrículas convocada por Galiza Nova, os Comités e a Liga Estudantil. A secretaria xeral da organización de mocidade do BNG, Iria Aboi, presentaba este mércores os actos que porán en marcha no marco dunhas mobilizacións coas que, di, apostan por denunciar que "o goberno de Rajoy está a amosar un desprezo absoluto polo ensino público cuns recortes que nos parecen inxustos, inxustificados e inútiles e que castigarán aínda máis á mocidade galega”.

"O obxectivo do PP é claro: beneficiar ao ensino privado e que só as elites poidan acceder á formación superior", di a nacionalista, que non agarda "cambios relevantes" na postura da Xunta a respecto dos ditados que chegan dende Madrid. Non obstante, Aboi considera que sería "positivo que o goberno de Feijóo tomase nota" da posición manifestada polos reitores "e anunciase o seu rexeitamento a aplicar os recortes en Galiza" e, ademais, "presentase un recurso de inconstitucionalidade por invasión de competencias". Así e todo, "cremos que Feijoo volverá antepoñer os intereses do seu partido aos intereses das galegos e dos galegos", di.