Como cada verán en Ourense, o Cineclube Padre Feijóo sacará as súas proxeccións á rúa durante este mes de agosto co ciclo Cinema na Praza. Este ano serán os luns os días elixidos para as proxeccións de balde na praza de San Marcial, todas a partir das 22 horas, se o tempo o permite.
A primeira sesión, este luns día 1, será de curtametraxes, con filmes dirixidos aos máis pequenos. O luns 8 proxectarase Tangerine (Sean Baker, 2015) no que a prostituta transxénero Sen-Dee Rella, que acaba de cumprir unha sentenza en prisión, atópase coa súa amiga Alexandra, que a informa de que o seu noivo Chester estivo a enganala, e xuntas percorren a cidade para descubrir a verdade.
O Cineclube Padre Feijóo saca as súas sesións de balde á praza de San Marcial os luns ás 22 horas
As dúas seguintes sesións irán destinadas á proxección de clásicos. O luns 22 será As aventuras do príncipe Achmed, (Lotte Reiniger, 1926), filme que narra o desexo dun gran califa de posuír, custe o que custe, un cabalo voador que lle ensina un podeiroso bruxo. E o luns 29 proxectarase O acoirazado Potemkin (Sergei Eisenstein, 1925), película revolucionaria no contido e na forma sobre o motín do buque e a revolución rusa. Estes dous últimos filmes serán musicados en directo polo grupo Caspervek.