A pretensión da Mostra Internacional de Teatro de Ribadavia de ser xestionada a través dunha fundación de carácter público para garantir o seu futuro e a súa estabilidade económica terá que esperar. Segundo puido saber Praza Pública, a consellería de Cultura, Educación e Ordenación Universitaria, non baralla “nin tan sequera como hipótese” a creación desta fundación. As razóns que manexan na consellaría de Cultura é que “neste momento económico crear un novo organismo parécenos ilóxico e descoñecemos cales son as verdadeiras intencións dos promotores”.
Na consellaría sosteñen que “dende o concello e dende a organización da Mostra teñen que buscarse vías alternativas de financiamento e acudir as achegas privadas como ocorre noutros eventos culturais e noutras partes do Estado”
Na consellaría sosteñen que “dende o concello e dende a organización da Mostra teñen que buscarse vías alternativas de financiamento e acudir as achegas privadas como ocorre noutros eventos culturais e noutras partes do Estado”. O que si compromete Cultura é a axuda económica para que poida celebrarse a 28 edición en xullo de 2012 pero “na medida das nosas posibilidades”.
Pola contra nos orzamentos xerais do Estado de 2012 mantense a partida para a Mostra Internacional de Teatro. Segundo comunicou a organización “a cantidade asignada polo ministerio de Educación, Cultura e Deporte é de 59.000 euros”. Esta cantidade é lixeiramente inferior a do ano pasado, uns 5.000 euros menos, pola política de recortes nos distintos departamentos. En todo caso, dende o concello, o alcalde socialista, Marcos Blanco, entende que “é unha boa noticia que se manteña a subvención nominativa”. Tamén o director da Mostra, Roberto Pascual, valora “positivamente" a estabilidade das axudas no proxecto orzamentario.
Pola contra, nos orzamentos xerais do Estado de 2012 mantense a partida para a Mostra Internacional de Teatro
Porén a confirmación das axudas por parte do Estado e da Xunta non completa as aspiracións dos responsables da Mostra que de maneira reiterada veñen de solicitar a Xunta un esforzo para librar a un dos maiores eventos culturais do país dos vaivéns económicos. A reiterada petición dunha fundación choca, neste caso, coa negativa da Xunta e provoca que teñan que estar contando ata o último euro para poder completar a programación. O director Roberto Pascual, nas súas intervencións públicas, non deixa de recordar a calidade artística da Mostra, o éxito entre o público, que enche todos os espectáculos, e mesmo a repercusión internacional que sitúa a Ribadavia e a Galicia na elite das artes escénicas.
Aínda que a programación da Mostra non está pechada “porque non temos o orzamento definitivo”, explica Pascual, xa se traballa para que non perda calidade e incremente a súa internacionalización
Internacionalización e novas propostas
Aínda que a programación da Mostra non está pechada “porque non temos o orzamento definitivo”, explica Pascual, xa se traballa para que non perda calidade e incremente a súa internacionalización. Neste sentido están avanzados os contactos co Instituto Goethe para traer algunha compañía a Ribadavia e mesmo pénsase na inclusión dalgún obradoiro para que poidan participar os alumnos da Escola Superior de Arte Dramático de Vigo.