Máis de vinte actuacións encherán de sorpresas, risas e compromiso social as rúas da cidade lucense. Ese é o espírito do Festiclown -organizado por Pallasos en Rebeldía e dirixido polo clown Iván Prado-, que ademais neste 2014 celebra o seu quince aniversario. Para festexalo repite por segundo curso consecutivo a fórmula de multisede, de xeito que visita este ano tres continentes. Antes do verán, o festival achegouse a Rivas-Vaciamadrid e Brasil, onde animou unha das favelas máis grandes do país. Xa en setembro, San Fernando de Henares converteuse nunha nova parada e agora o traxecto remata en Lugo e Cisxordania, que recibirán ao Festiclown de forma simultánea.
Lugo recibirá a visita de clowns e artistas de prestixio internacional. Peter Punk, Os Sete Magníficos máis 1, Código Morsa, Circo Chosco, a Magnifique Bande dos Homes sen Medo, Fanfarria Taquicardia ou o alemán Djuggledy serán algúns dos artistas que intervirán. Precisamente Código Morsa serán os encargados de abrir este sábado 4 a programación nas rúas co seu espectáculo Supergalácticos, na Praza do Campo ás 17 horas. A partir dese momento arrincará un completo programa de actividades que terá lugar entre o 4 e o 11 de outubro, coincidindo coas Festas de San Froilán.
Peter Punk, Os Sete Magníficos máis 1, Código Morsa, Circo Chosco, a Magnifique Bande dos Homes sen Medo, Fanfarria Taquicardia ou o alemán Djuggledy serán algúns dos artistas que intervirán
O Festiclown divide a súa programación nunha serie de apartados. O primeiro deles é a Mostra Internacional, que contará coa participación do clown Peter Punk, da compañía Mundo Mandarina, do mago Miguelillo e do artista alemán Djuggledy. O segundo apartado é o Desclowntrol nas rúas, que se encarga de animar Lugo con pasarrúas, actuacións ao aire libre e música a cargo da Magnifique Bande dos Homes sen Medo, de Fanfarria Taquikardia ou Cé Orquestra Pantasma.
O terceiro apartado é o dedicado ao ámbito social e en Lugo estará constituído por unha mesa redonda, na que se analizará a situación teatral en Lugo e a fronteira entre a escena profesional e a amadora. Celebrarase o xoves 9. Ademais, o Centro Cultural Uxío Novoneyra acollerá unha mostra sobre as actividades levadas a cabo en Palestina por Festiclown –que estará a disposición do público dende o venres 3 de outubro-. Tamén está prevista o martes 7 a proxección do documental Tres miradas, dous obxectivos no mesmo recinto, unha fita asinada por varios autores sobre a situación nos territorios ocupados.
Un dos apartados máis importantes do Festiclown dende a súa fundación fai quince anos é o dedicado á formación. Neste tempo, realizáronse máis de 150 cursos e obradoiros nos que asistiron preto de dúas mil persoas. En Lugo, será o propio Iván Prado quen imparta un curso en sesión partida entre o venres 10 e o sábado 11 titulado Pallaseando a existencia.
En paralelo, en Palestina
Dende o 1 de outubro, ademais, o Festiclown está en Palestina, nas cidades de Nablus, Ramala e Xerusalén, que até o día 9 acollerán distintas actuacións en apoio das vítimas de Gaza
Dende o 1 de outubro, ademais, o Festiclown está en Palestina, nas cidades de Nablus, Ramala e Xerusalén, que até o día 9 acollerán distintas actuacións en apoio das vítimas dos ataques israelís sobre a poboación civil en Gaza. Ademais do prestixioso actor e clown Pepe Viyuela e do propio Iván Prado, tamén participan artistas recoñecidos no ámbito circense, como o escocés Johny Melville, os brasileiros da compañía Traço e os españois Kanbahiota, Pablo Muñoz e Daviz Cebrián, a italiana Laura Mandarina e o arxentino Marcelo González. O músico madrileño Mr. Kilombo tamén se desprazou a Palestina co festival para darlle un toque musical á programación, que se completará coas actuacións de compañías locais.
