0 Gardados para despois

O Vigo de Paz-Andrade centrou os actos oficiais do 17M

Marcos Pérez PenaMarcos Pérez Pena | @marcosperezpena


Se a celebración máis popular e reivindicativa tivo Compostela como escenario, a oficial e académica, dedicada á figura de Valentín Paz-Andrade, centrou os seus actos en Vigo. Comezou coa homenaxe do Concello, que descubriu unha placa no Sanchón, onde Paz Andrade desenvolveu a súa carreira; no acto interviron o seu fillo Alfonso e a súa neta, que leu o poema Cando ti volvas. Ademais, falou o alcalde da cidade, Abel Caballero, que destacou o seu impulso "á democracia, á cultura e a empresa servindo sempre á causa de Galicia" e actuou Son de Seu, ante o numeroso público que asistiu, en Policarpo Sanz.

Vence salientou que Paz-Andrade foi "un patriota galego, que nunca caeu no provincianismo" e que "predicou co exemplo" e foi "un home de acción"

A seguir, celebrouse unha sesión plenaria extraordinaria e pública da Real Academia Galega na sede Fundación Barrié na cidade olívica, na que interviron Xavier Vence, Manuel Rivas, Ramón Villares, Xosé Ramón Barreiro e Xesús Alonso Montero. Vence salientou que Paz-Andrade foi "un patriota galego, que nunca caeu no provincianismo" e que "predicou co exemplo" e foi "un home de acción". Pola súa banda, Rivas salientou o seu labor xornalístico: "Poesía e xornalismo teñen e común a capacidade de traspasar o prohibido, e Valentín Paz-Andrade deixou bos exemplos de poesía e de xornalismo" e dixo que "en Galicia fomos capaces de facer a mellor prensa, eis o seu Galicia, un lugar de encontro modélico".

Pola súa banda, Villares centrou o seu discurso na vocación de universalidade do homenaxeado: "Apostou por colocar a Galicia no mundo, sen deixar de ser galego" e recordou o seu papel na Transición: "Ocupou na comisión dos 10 a cadeira de Galicia, xa que gozaba a lexitimidade moral do galeguismo republicano". Finalmente, Alonso Montero salientou a calidade da poesía de Paz-Andrade, que -dixo- foi un exemplo de como "a poesía é unha forma de achegarnos a realidade, sobre todo cando bate na nosa contra".

O terceiro dos actos oficiais tivo como escenario o CEIP Valentín Paz-Andrade, onde se celebrou o acto da Xunta de Galicia e se inaugurou unha exposición sobre o homenaxeado. Alí falaron de novo Alfonso Paz-Andrade, Abel Caballero e Xosé Luís Méndez Ferrín, que confirmou que a finais de ano a RAG organizará un congreso científico sobre o homenaxeado. Tamén falou Alberto Núñez Feijoo. O presidente da Xunta afirmou que “celebramos hoxe unha lingua que une e unha cultura que nos proporciona unha proxección exterior que non teñen todos os territorios. Esa lingua e esa cultura fannos estar no mundo co noso propio cerne, e dannos a posibilidade de sermos un país máis próspero. Pensemos por exemplo na conexión que temos co mundo lusófono grazas ao galego”.

Núñez Feijoo salientou que a lingua "danos a posibilidade de sermos un país máis próspero. Pensemos por exemplo na conexión que temos co mundo lusófono grazas ao galego”

Así mesmo, Núñez Feijoo salientou o papel de Vigo na traxectoria de Paz-Andrade: “Vigo foi a súa gran paixón, pero unha paixón sen muros, que obrigaba a ampliar os horizontes. Vigo foi o seu punto de apoio para transformar Galicia enteira e proxectala ao mundo” e a vocación universalista do homenaxeado: “No seu labor intelectual, empresarial, político hai un anhelo permanente por atopar novas rutas que amplíen as marxes da galeguidade”.

Coa túa achega fas posible que sigamos publicando novas coma esta.