Unha ducia de ratos
A mediática detención de Rodrigo Rato, noutrora facedor do disque "milagre económico español", por varios delitos ligados á corrupción dános a oportunidade de facer un pouco elaborado xogo de palabras e repasarmos algúns ratos senlleiros. Porque é fin de semana.
-
01
Pérez
Un dos máis coñecidos. O rato Pérez ten diversas denominacións en función dos países e vén cumprir a útil función de explicarlles ás nenas e nenos onde van os dentes que lles caen moito antes de teren que saber que a asistencia bucodental non entra, as máis das veces, nas prestacións da sanidade pública.
-
02
Mickey
O rato multinacional. A creación e emblema da factoría Disney ten como ano oficial de nacemento 1928 e a empresa teno tan asociado á súa propia marca que chegou a forzar que a súa imaxe fose borrada de varias escolas infantís nos Estados Unidos. Puro riquiñismo, vaia.
-
03
Os do Ratibrón
Involuntarios protagonistas dalgúns dos anuncios publicitarios máis populares do país. Meus pobres.
-
04
Pixie e Dixie
Os populares ratiños de Hanna Barbera son os protagonistas de múltiples historias que consisten, esencialmente, en fuxir do gato Jinks mentres lle fan todas as trasnadas posibles.
-
05
Jerry
Tamén saídos da factoría Hanna Barbera, Tom e Jerry protagonizan historias non moi diferentes ás de Pixie e Dixie, coa diferenza fundamental de que neste caso as batallas son un contra un. O rato, Jerry, é un tipo máis ben listo e o gato, Tom, tende a ser algo máis parvo.
-
06
Remy
O protagonista de Ratatouille é un rato con grandes habilidades culinarias, tanto que é quen de llelas transmitir aos humanos
-
07
Pica
Versión salvaxe de Tom e Jerry saída do mundo dos Simpsons. Itchy and Scratchy -Rasca y Pica na súa versión española- son un gato e un rato no que o roedor non só se limita a escapar do felino, senón que o tortura e, nas máis das ocasións, acaba por matalo. Nada pedagóxico.
-
08
O Súper Rato
Saído dos estudios Terry Toon como parodia roedora de Superman é un dos ratos potencialmente máis poderosos.
-
09
Os de V
Alimento preferido duns personaxes que marcaron unha xeración
-
10
Basil
Disney foi especialmente propenso a buscarlles emprego aos ratos. Neste caso, Basil é detective. Superdetective, concretamente.
-
11
Os de laboratorio
En moitas ocasións, campo de probas de experimentos e tratamentos que despois acaban chegando ao ser humano. Nalgúns países, como o Brasil, xa se procurán vías alternativas para evitar este tipo de prácticas.
-
12
Rodrigo
O súper ministro que chegou a ser un dos homes con maior poder financeiro do mundo, agora caído en desgraza polas súas malas artes económicas e fiscais. Hai quen ve nel un simple corrupto e outros, tamén, un chivo expiatorio. Veremos.