Unha ducia de citas para o 25 de xullo
Este luns celébrase o 25 de xullo, Día Nacional de Galicia. Santiago de Compostela acolle a maior parte de actos lúdicos, culturais e políticos dunha xornada inzada de celebracións en todo o país.
-
01
Romaría dos libros
A praza de Mazarelos acolle o 24 e 25 de xullo a Romaría dos Libros de Compostela Literaria, na que participan 15 entidades do sector do libro de Compostela e comarca
-
02
Festigal
Unha das citas xa tradicionais para o 24 e 25 de xullo en Compostela é o Festigal, que coma todos os anos se celebra no Campus Sur
-
03
Actos institucionais
Ademais da tradicional Ofrenda relixiosa na Catedral, que este ano será realizada polo presidente da Xunta, Alberto Núñez Feijoo, en nome do rei Felipe VI, hai que salientar a entrega das Medalla de Ouro de Galicia (a Manuel Gallego Jorreto, Francisco Leiro Lois, Basilio Losada Castro e a Los Suaves), que terá lugar o domingo 24.
-
04
Festas en Compostela
Non hai que esquecer que Compostela está en plenas festas. Na noite do 24 ten lugar no Obradoiro o tradicional espectáculo de fogos artificiais. O 25 pola noite a Quintana acolle un concerto gratuíto de Samesugas e Ruxe-Ruxe, dúas bandas da cidade con vinte anos de traxectoria en cada caso.
-
05
O 25 de xullo, puntogal
Puntogal lanza un 'Documento Galego de Identidade na rede' para o 25 de xullo. Os e as usuarias da web da asociación poderán personalizalo, descargalo e compartilo nas redes sociais. Ademais, como parte da campaña, os dominios .gal ofreceranse a menos de 20 euros (máis IVE)
-
06
Manifestación do BNG
Tamén é tradicional a manifestación convocada polo BNG, con saída da Alameda ás 12 horas e remate na praza da Quintana, pechando o acto o discurso da portavoz nacional da formación, Ana Pontón. Ademais, o 24 de xullo ás 20 horas cinco organizacións xuvenís, entre elas Galiza Nova, levarán a cabo outra manifestación, baixo o lema Galiza somos nós
-
07
Acto de Anova
Anova-IN celebrará o seu acto político, con posterior convivio e festa, no Parque de Galeras de Compostela. O acto político comezará ás 13:00 horas e estará centrado na homenaxe ás Irmandades da Fala no seu centenario.
-
08
Acto de CxG
Os actos organizados por Compromiso por Galicia no 25 de xullo desenvolveranse no parque Eugenio Granell de Santiago de Compostela. Ás 13:30h terá lugar un acto político no que se presentarán os cabezas de lista da formación polas catro provincias galegas. Ás 14:30h terá lugar un xantar de confraternidade, e a partir das cinco da tarde haberá distintas actuacións musicais.
-
09
Acto do PSdeG-PSOE en Rianxo
O PSdeG-PSOE celebra o 25 de xullo cunha ofrenda floral ante o busto de Castelao en Rianxo.
-
10
Outros Santiago, por exemplo en Padrón
Hai moitos Santiagos en Galicia, ademais do de Compostela. Polo tanto, o 25 de xullo celébranse numerosas festas en todo o país. Por exemplo, a romaría de Santiaguiño do Monte, en Padrón.
-
11
Regueifas no Festigal
Entre a variada programación do Festigal para o 25, podemos destacar a mostra mundial de regueifas que se realizará a partir das 17 horas, coa participación dos regueifeiros Josinho da Teixeira e Bieito Lobariñas
-
12
De praia
O 25 de xullo fará, en principio, día de praia, sobre todo no centro e no sur do país. De seguro que moitos e moitas aproveitarán o festivo para achegarse aos areais, a goar dun descanso ben merecido.