Unha ducia de citas a non perder no San Froilán de Lugo
Unha das principais fronteiras entre o verán e o outono en Galicia é o San Froilán de Lugo. As patronais lucenses, do 4 ao 12 de outubro, traen consigo nove días e nove noites de festa nos que o programa de cada ano se combina cos imprescindibles de sempre: o polbo, o recinto feiral e a propia veciñanza dunha cidade que nestes días arrecende diferente. Todo o programa, aquí.
-
01
A finde previa, para ir quecendo
As festas do San Froilán 2016 non comezan oficialmente ata o martes, 4 de outubro. Pero na fin de semana dos días 1 e 2 xa están en marcha dous dos seus emblemas: o recinto ferial -as barracas, se nos les dende Lugo- e mais as casetas do polbo que, tras máis avatares do normal, xa están onde corresponde, no inicio das costas do parque Rosalía.
-
02
O pregón
Unha das chaves das festas de Lugo é o equilibrio entre as patronais vilegas e os ingredientes das festas urbanas. En ambas non pode faltar un pregón dende o balcón do Concello. Desta volta é o martes 4, ás 20:30, momento no que pregoará as festas un clásico das ondas lucenses, Paco Nieto, xornalista de Radio Lugo.
-
03
Son galego, son cubano
Unha das estrelas das festas chega na súa primeira noite. Roi Casal presenta o seu 'Son galego, son cubano', na praza Horta do Seminario ás 21:30 do 4 de outubro.
-
04
O (primeiro) día grande
Un dos días grandes das festas é, como corresponde, o do patrón. O 5 de outubro, Día de San Froilán e festivo na capital lucense, comeza a mediodía con actos oficiais e continúa, ás 13:00, con sesión vermú na Praza do Campo Castelo. A axenda do día é intensa, e unha das citas a non perder é ás 21:30 na Praza de Santa María. Polo escenario pasarán Caxade, Familia Caamagno, Arrhytimia e Conducto Coloquio.
-
05
Homenaxe a Manuel María
No día en que se farán 87 anos do nacemento do poeta da Terra Chá, o 6 de outubro, Manuel María será homenaxeado nas festas que el mesmo pregoou en 1996. Na cidade na que viviu de mozo e coa que conviviu toda a súa vida subirán ao escenario da Praza de Santa María os membros d'A Quenlla para honralo como culminación ao ano no que o Día das Letras foi para el e celebrar a súa figura "nas festas que el tanto amou e celebrou".
-
06
Kepa Junkera e jazz
Ás portas da fin de semana grande das festas, o venres 7, será a quenda no escenario de Santa María para Kepa Junkera. O músico vasco non chega só a Lugo: vaino facer acompañado pola Orquestra de Jazz de Galicia.
-
07
Día de Ferrol
Como cada ano nas festas de Lugo, neste 2016 hai tamén un día dedicado a Ferrol. O sábado 8 a mediodía a corporación ferrolá é recibida na casa do Concello. A banda musical desta xornada vai dende o ídolo adolescente Abraham Mateo (21:00, Horta do Seminario) ata Pepe Vaamonde Grupo (22:00, Santa María) e, por suposto, os pasarrúas pola zona histórica e barrios como a Fonte dos Ranchos.
-
08
Domingo das Mozas
Se é domingo na semana en que foi Día de San Froilán, en Lugo é Domingo das Mozas. A que tamén é xornada do traxe tradicional trae consigo un amplísimo abano de actividades que comeza ás 11:00 co San Froilán Tecedeiro no parque de Rosalía, onde tamén se ofrendará á escritora ás 12:00, desta volta con Lupe Bao como protagonista. Unha das estrelas da xornada será o concerto de Xabier Díaz e as Adufeiras de Salitre, ás 23:00 na Praza de Santa María.
-
09
Animación de rúa pola zona dos viños
A contorna da Praza do Campo, a zona dos viños, é cita case obrigada para lucenses e festeiros nos días do San Froilán. Contra o serán e a noite non é difícil atopar as charangas e pasarrúas que lle poñen banda sonora aos viños, ás cervexas é (como non, estamos en Lugo) ás tapas de balde.
-
10
Carlos Núñez e Ana Moura
Na véspera de fin de festa, o martes días 11, dous nomes grandes para o San Froilán. A cita coa mestura de fado e pop da portuguesa Ana Moura é ás 23:00 na praza de Santa María. A quenda do gaiteiro Carlos Núñez é un chisco antes, ás 21:30 na Horta do Seminario.
-
11
O San Froilán Miúdo
A rapazada ten un espazo de seu no San Froilán, desta volta concentrado no patio do Seminario. Karaoke infantil, concertos didáticos para "aprender a escoitar", maxia para bebés, unha versión moderna do mítico Barriga Verde, xogos populares, obradoiro de cestos... Para non se aburrir!
-
12
E o polbo, evidentemente
O debate será eterno entre costa e interior, pero o certo é que o San Froilán é inconcibible sen polbo. Desta volta a instalación das tradicionais casetas foi algo accidentada, pero aí están, onde sempre. Ademais, alén do recinto feiral as opcións son case incontables. Se chega a Lugo dende fóra, preste atención: o que lle semella un garaxe pode ser o sitio no que probe un cefalópodo que non ha esquecer. Boas festas!