Unha ducia de ideas para gozar coa rapazada un novembro en galego
A chegada do outono, e con el da chuvia e de días con menos horas de luz, non é un impedimento para seguir pasándoo ben coa rapazada e en galego. Aquí vai unha ducia de propostas lanzadas desde Apego, o proxecto para impulsar o galego na infancia.
-
01
O ratiño presumido, en Narón
O sábado 4 de novembro, ás 11 da mañá e de balde na biblioteca municipal de Narón, animación á lectura desde o teatro da man de Trinke Trinke e os seus ratiños.
-
02
A poesía é un xogo, en Pontevedra
Tamén o sábado día 4, ás 12 do mediodía na Casa da Luz en Pontevedra, un achegamento á poesía dun xeito lúdico, coñecendo recursos para aprender e aproveitala como xogo da man de Fedellas: Tamara Andrés e Susana Cerviño.
-
03
Son Xogos, Xogos Sons, en Sada
O domingo día 5, ás 12 do mediodía na avenida da Mariña de Sada, montarase unha pequena orquestra de nenas e nenos con distintos instrumentos e músicas de diversas épocas.
-
04
O sal do mar e outros contos mariñeiros, en Vimianzo
No Outono Rebuldeiro de Vimianzo, o domingo día 5 ás 18.30 horas, no auditorio e de balde, pódese desfrutar do espectáculo O sal do mar e outros contos mariñeiros.
-
05
Había unha vez, en Ferrol
No salón de actos do antigo hospicio, na rúa Méndez Núñez de Ferrol, todos os martes do mes de novembro ás 17.30 horas, haberá un obradoiro para aprender a contar contos á rapazada.
-
06
Contos nas bibliotecas de Ames
As bibliotecas de Bertarmiráns e Milladoiro, en Ames, acollen sesións de contacontos ás seis da tarde, nunha ou noutra instalación, os días 8, 9, 22 e 23 de novembro. O sábado día 11, na Casa da Cultura do Millladoiro, ás 11 da mañá, haberá un obradoiro poético de María Canosa baseado no Libro dos medos.
-
07
Cantacontos para bebés na Coruña
Os mércores 8 e 15 de novembro, ás seis da tarde no centro Ágora da Coruña, Pablo Díaz fará unha viaxe a través dos contos coa música como fío condutor, tratando temas e rutinas adaptadas para os máis pequenos. Para conseguilo, axudarase de instrumentos como frautas, guitarra, harmónica e algún dos seus temas máis populares.
-
08
Viaxe a Sudamérica, en Carballo
O mércores día 15, en dúas sesións ás 17 e as 18.30 horas na biblioteca Rego da Balsa en Carballo, os ratos de Lonxedetodo volven dunha longa viaxe por América do Sur e Central. Un percorrido por Arxentina, México, Cuba, Venezuela e Brasil. Así dramatizarán algunhas das anécdotas máis divertidas da súa viaxe e darannos a coñecer autores e autoras da literatura infantil daquel continente tanto en prosa como en verso, así como algunhas fermosas cancións do seu folclore.
-
09
Contos pequeniños, en Pontevedra
O xoves 16, na Casa da Luz de Pontevedra ás 18.15 horas, Cris de Caldas, con xogos de man, recursos tradicionais, visuais… achégase á riqueza da oralidade para xogar coas máis pequerrechas e pequerrechos da casa.
-
10
Un bico para Alí, en Carballo
O mércores día 22, en dúas sesións ás 17.00 e 18.30 horas no salón de actos do Pazo da Cultura de Carballo, narración oral e musical e achegamento a recursos infantís.
-
11
Fálame moito e ben, en Ames
O xoves día 30, no Pazo da Peregrina de Bertamiráns, en Ames, ás seis da tarde, unha charla-obradoiro achegarase a cuestións como a estimulación da linguaxe, a evolución comunicativa das crianzas, o proceso de adquisición da linguaxe cando conviven dous idiomas…
-
12
Asociación de Animais Solidarios, en Carballo
O mércores 29 de novembro, en dúas sesións ás 17.00 e 18.30 horas, na biblioteca Rego da Balsa de Carballo a ratiña Carolina montará a oficina da Asociación de Animais Solidarios. A través dos tres teléfonos que ten sobre a mesa comeza a recibir chamadas de distintos animais que acoden á asociación na procura de axuda para resolver variados problemas.