0 Gardados para despois

Praza Pública

Unha ducia de variedades de castaña galega

O outono é tempo de castañas, aínda que a meteoroloxía faga que este ano non sexa especialmente bo para o produto. Hai quen pode pensar que todas as castañas galegas son iguais, pero o certo é que existen variedades diversas, multiplicadas a través dos enxertos durante séculos por soutos de todo o país. A Indicación Xeográfica Protexida 'Castaña de Galicia' divulga as diferentes variedades de castaña e vela pola súa protección e promoción. Velaquí unha ducia delas.

Imaxes: IXP Castaña de Galicia

  • Amarelante

    É unha das consideradas de maior interese. É a castaña propia da Terra de Trives.

  • De presa

    Dáse na montaña lucense. As producións uniformes de castaña son máis valoradas.

  • Branca

    Durante moitos anos en cada souto enxertábanse de tres a cinco variedades diferentes para "obter produtos óptimos", explican dende a IXP.

  • Calva

    Os xeitos máis habituais de preparar as castañas son asadas ou cocidas. Se están mesturadas varias variedades son menos valoradas para a venda en fresco.

  • Inxerta

    A evolución na produción de castaña permitiu ampliar o período de colleita  dende finais de setembro e ata mediados de novembro. Hai variedades aneiras e variedades que son produtivas todos os anos.

  • De parede

    As castañas de parede danse en varias comarcas do país, como tamén sucede coa rapada, por exemplo.

  • Negral

    A castaña negral é propia de Valdeorras. É unha das áreas, destaca a IXP, na que dende hai décadas se propagaron as variedades locais que actualmente son máis aprecidadas.

  • Luguesa

    O nome da variedade remite a Lugo, aínda que realmente é posible atopala en varias comarcas de Galicia. Así e todo, os soutos son diferentes de comarca a comarca.

  • Loura

    Os principais usos da castaña son na actualidade o pelado na industria e a venda en fresco. Antigamente, non obstante, eran fundamentais para a manutención de persoas e animais.

  • Longal

    A castaña longal é propia do extremo suroeste da provincia de Ourense. A castaña ventura tamén se dá nesta área.

  • Garrida

    A garrida é posible atopala na meseta lucense.

  • Famosa

    A castaña famosa é tamén unha castaña ourensá. Ademais desta ducia que vimos de coñecer, a IXP destaca outras como a raigona ou a verdella.