Unha ducia de novas máis lidas en Praza.gal durante 2018
Pechamos un ano informativamente intensísimo para abrir outro que se prevé que non o sexa menos. Pasaron moitas, moitísimas cousas. Entre elas, estas doce que as persoas que visitades Praza.gal convertestes nas novas máis lidas do 2018. Repasámolas antes de poñernos a contar o 2019.
-
01
Dimiten os presentadores do Telexornal Serán
O 19 de xuño Praza.gal avanzaba a dimisión dos xornalistas que ata ese momento presentaban o Telexornal Serán da TVG para rexeitaren o control informativo na canle. "Razóns profesionais" e "discrepancias coa liña informativa" impedíanlles seguir realizando ese labor, explicaron.
-
02
Traballadoras de Inditex piden non usar as caixas de autocobro
En setembro traballadoras de Inditex na provincia da Coruña intensificaban as súas mobilizacións para reclamar melloras nas súas condicións laborais e na distribución de carga de traballo no canto de "aforrar cartos" mediante a instalación de caixas automáticas. A empresa declinou ofrecer a súa versión.
-
03
A lingua de 'Fariña'
A serie Fariña, realizada pola galega Bambú Producciones a partir do libro homónimo do xornalista Nacho Carretero, foi un dos fenómenos audiovisuais do ano e un dos aspectos máis comentados da produción foi o xeito de falar dos personaxes. A lingüista da serie, Rosa Moledo, explicounos o seu traballo nesta entrevista, onde tamén repasamos parte da súa dilatada traxectoria no audiovisual galego.
-
04
O eucalipto invasor
En abril o Comité Científico de Flora e Fauna Silvestres do Ministerio de Agricultura recomendou por unanimidade a inclusión do eucalipto no Catálogo Estatal de Especies Exóticas e Invasoras e limitar a súa plantación. Movementos ambientalistas aplaudiron o ditame, que Xunta e Goberno central rexeitaron.
-
05
Feijóo e a síndrome de Besteiro
A mediados de xuño o PP fervía tras perder o Goberno de España e todos os focos viraban cara ao presidente da Xunta como eventual sucesor de Mariano Rajoy. Nesta crónica Anxo Lugilde analizaba os riscos que pairaban sobre Feijóo no caso de cambiar a política galega pola estatal. Ao día seguinte o líder do PPdeG anunciou que non sería candidato nas eleccións internas do seu partido.
-
06
O relato en primeira persoa de infartar en Lugo fóra de horas
En febreiro Pedro Díaz, un veciño de Lugo, relatou en primeira persoa para Praza.gal o vivido tras padecer un infarto fóra do horario de apertura da sala de hemodinámica, a unidade do Hospital Lucus Augusti que atende esta doenza. "Tiven sorte de aguantar a viaxe á Coruña", explicaba. Días despois, o Sergas confirmaba a ampliación do horario, que deixou de ser 'de oficina', pero aínda pechando durante as noites.
-
07
Doce votos galegos a prol da ignorancia do galego
En setembro Ciudadanos levou outra volta ao Congreso a súa teima contra a necesidade de que o funcionariado que traballe en Galicia, Euskadi ou Catalunya teña que coñecer o galego, o catalán ou o euskera para atender a poboación que fala nestes idiomas. A proposta, defendida por Toni Cantó nun controvertido discurso, tivo os doce votos a prol dos representantes galegos do PP. Malia este apoio, non saíu adiante.
-
08
En vésperas da gran folga feminista
O 23 de febreiro Praza.gal informaba da manifestación que o movemento feminista galego estaba a ultimar en Vigo para o 4 de marzo , en vésperas da folga feminista do 8M. A manifestación foi masiva, tan exitosa como a folga mesma.
-
09
A chuvia deteriora os piares dun viaduto da A-8 por un erro de deseño
A finais de outubro Praza.gal informaba doutro erro de deseño na A-8 ao seu paso por Mondoñedo, na zona onde a néboa provoca cortes recorrentes do tránsito. O Ministerio de Fomento admitía que, neste caso, o erro provocaba o deterioro dos piares dun viaduto por mor da chuvia.
-
10
Pagar máis pola luz para compensar ás eléctricas
A finais de xaneiro o Goberno central confirmaba que en Galicia ía subir o recibo da luz durante arredor dun ano para compensar as empresas eléctricas por impostos pagados no ano 2013, tal e como ditaminara o Tribunal Supremo.
-
11
O cruceiro máis antigo, en risco por un concerto da Panorama
En agosto coñecemos que o cruceiro situado ao carón da igrexa de San Roque, en Melide, estivera en risco de deterioro e mesmo de destrución durante as xornadas festivas na vila. A razón foi a montaxe do escenario da orquestra Panorama para ofrecer un concerto.
-
12
O feminismo fai historia nun 8M masivo
A xornada de folga feminista do 8 de marzo deixou tamén en Galicia imaxes para a historia. O amplo seguimento dos paros laborais tivo o seu reflexo en masivas manifestacións tanto durante a mañá como contra o serán. A Praza Maior de Ourense, a Praza do Obradoiro de Santiago ou as principais rúas do centro de Vigo ateigadas de manifestantes tornaron en símbolos do éxito da mobilización.