O 2015 será un bo ano para o turismo en Galicia e para o sector hoteleiro. A falta de coñecer o dato de decembro, a cifra de viaxeiros que pasaron polos hoteis da comunidade rolda os 3,9 millóns, un máximo histórico que supera os 3,8 millóns do ano 2010 e que se situará por riba dos catro millóns no total do ano. O número de pernoctacións rolda os 7,4 millóns, por debaixo aínda dos datos entre 2004 e 2010, os mellores rexistros ata agora.
O sector hoteleiro vai saíndo da crise que sufriu despois do último ano Xacobeo. Entre 2010 e 2012 perdera medio millón de viaxeiros e 1,5 millóns de pernoctacións. Nos últimos tres anos a mellora dos datos foi constante e é, sobre todo, o turismo estranxeiro o responsable desta recuperación.
O peso dos e das visitantes de fóra de España non deixou de crecer nos últimos anos. Se en 1999 representaban apenas o 12% das pernoctacións anuais nos hoteis galegos, dez anos máis tarde eran xa o 16%, e en 2015 (datos ata novembro) chegan ao 24% do total. De feito, mentres que o número de noites de hotel contratadas polos e polas turistas do resto de España será en 2015 semellante ao dato de 1999 (algo menos de seis millóns), as pernoctacións de estranxeiros e estranxeiras máis que duplican ás de hai 15 anos. A falta do dato de decembro, a cifra supera xa os 1,76 millóns de noites de hotel, un máximo histórico.
Melloran tamén os datos nos establecmentos de turismo rural, con 178 mil usuarios e usuarias nos 11 primeiros meses do ano fronte aos 160 mil do 2014 e os 129 mil de 2013. O rexistro deste 2015 achégase ao de 2010 (193 mil). Crece tamén lixeiramente o número de usuarios nos campings galegos, dos 221 mil do pasado ano ata os 223 mil do 2015.