O PP admite no seu programa que os remolcadores de Pemex aínda se están "a negociar"

Treito do programa do PP coas referencias a Pemex © PPdeG

"Agora está nas mans dos estaleiros galegos responder en calidade e prezo ás esixencias dunha das catro maiores petroleiras do mundo". O pasado 24 de maio o presidente da Xunta e actual candidato á reelección, Alberto Núñez Feijóo, pronunciábase deste xeito nun acto solemne celebrado no salón nobre do Pazo de Raxoi. Ante diversos empresarios do naval galego, ao carón do director xeral da petroleira mexicana Pemex, Juan José Suárez Coppel, e coas cámaras da TVG en directo, Feijóo anunciaba a sinatura dunha "alianza estratéxica" coa empresa que suporía a construción en estaleiros do país de sete remolcadores para a flota menor da compañía, así como a participación noutros sete máis. As contas soaban máis que ben para aliviar os males dun sector en fonda crise: 310 millóns de dólares -uns 247 millóns de euros-, "máis de 2,6 millóns de horas de traballo" e 2.500 empregos "entre directos e indirectos, na industria auxiliar", resumía.

Cinco meses e moitos máis avatares despois o contido dos documentos asinados naquel acto segue a ser unha incógnita -a Xunta non o fixo público malia ás reiteradas peticións do sector e tamén de PSdeG e BNG a través das canles parlamentarias- e parte da súa tradución práctica semella que tamén. Mentres Pemex continúa a asegurar que a construción de dous buques hotel en Galicia aínda non está pechada, agora é un actor inesperado, o PP, quen admite que a contratación dos remolcadores tampouco está feita. Ao contrario da instalación da petroleira no porto exterior da Coruña, tamén anunciada naquel acto e que semella avanzar, no caso dos remolcadores os conservadores recoñecen que os encargos aínda non son unha realidade inamovible.

Feijóo asegurou que os remolcadores deixarían en Galicia un investimento de 310 millóns de dólares e 2.500 empregos

Fano no programa electoral co que concorren ás eleccións do 21 de outubro, no que dedican unha páxina a describir o "intenso traballo liderado polo presidente da Xunta" para a sinatura do "acordo de colaboración" con Pemex. Neste documento descríbese que a multinacional "xa está tramitando a concesión de terreos no porto exterior da Coruña" e dáse por seguro que PMI -empresa subsidiaria de Pemex- "asinou senllos contratos para a construción de dous floteis" en Barreras e Navantia. Máis cautelas se amosan ao falar dos remolcadores, dos que tampouco se refire a cantidade concreta: "a petroleira mexicana está a negociar cos estaleiros galegos a contratación de varios remolcadores no marco da renovación da súa flota menor", di.

Neste contexto, a menos de dúas semanas da cita coas urnas semella que as incertezas seguirán a dominar esta cuestión. Así e todo, o programa dos conservadores inclúe tamén o compromiso de "intensificar o traballo con Pemex para profundizar no alcance e contido da alianza estratéxica", "tanto no que se refire á colaboración de Galicia no proceso de renovación da súa flota como na súa presenza e operativa no porto de punta Langosteira".

Feijóo, con directivos de Pemex no balcón do Pazo de Raxoi © Xoán Crespo

Despece

  • O comité de Navantia censura o "ocultismo" co contrato de Pemex

    O comité de Navantia censurou este martes a "blindaxe e o ocultismo" que, segundo os sindicatos, está a rodear o contrato entre os estaleiros de Ferrol e o de Barreras coa petroleira Pemex para a construción de dous remolcadores. Ignacio Naveiras, voceiros dos traballadores, criticou o uso "electoralista" do acordo no debate electoral entre Feijóo e Pachi Vázquez e pediulle que amose o devandito contrato.

    "Xera inquedanza e incertidume", denuncian os sindicatos

    Para os sindicatos do naval ferrolán, esta situación xera "inquedanza e incertidume" sobre o futuro de Navantia na ría de Ferrol, polo que emprezan o presidente da Xunta a "que demostre que o que di é certo sen risco para o contrato". "Dános que pensar porque o mesmo día que Feijóo dixo que non tiña problema en ensinalo, negoullo ao Parlamento", explica Naveiras, tras lembrar que a dirección do estaleiro público tampouco mostrou o texto. "É a primeira vez que ocorre", dixo.

    Os sindicatos preparan accións sorpresa durante a campaña electoral

    Os sindicatos preparan un novo calendario de mobilizacións e accións sorpresa durante os próximos días coincidindo coa campaña electoral dos comicios galegos do 21 de outubro. O vindeiro mércores, día 17, convocaron unha manifestación comarcal xunto á CIG e a USTG.

    Protesta de traballadores do naval en Ferrol Dominio Público Praza Pública

  • O PSOE pide ao Congreso que o Goberno entregue os contratos

    A voceira do PSOE, Soraya Rodríguez, anunciou este martes en rolda de prensa que vén de remitir unha darta ao presidente do Congreso para reclamar que o Goberno entregue na Cámara os contratos "presuntamente" asinados coa empresa mecicana Pemex para a construción dos dous floteis nos estaleiros galegos e ante a negativa do Executivo de facelos públicos. "Que se mostren para disipar as dúbidas".

    Os socialistas propoñen unha comisión a porta pechada ou a de segredos oficiais para evitar facer públicos os acordos se ese é o problema

    Así, aludiu á "garantía de transparencia" e ao "exercicio lexítimo da democracia" para que se dispoñan dos "procedementos axeitados" para que os parlamentarios poidan exercer o seu dereito a acceder a estes documentos e que, para preservar as esixencias de confidencialidade que argumenta a SEPI, se convoque unha Comisión de Industira a porta pechada ou que se habilite a Comisión de Segredos Oficiais.

    Ademais, o ministro de Facenda e Administracións Públicas, Cristóbal Montoro, ratificou a existencia dos contratos e anunciou que hai outros en marcha. "Os contratos existen, son privados e suxeitos á confidencialidade propia dun contrato privado entre Pemex e os estaleiros de Vigo e Navantia", reiterou no pleno do Senado. Así mesmo, pediu ao PSOE que non confunda a campaña electoral galega con abrir as posibilidades para que Navantia gañe en contratos, en carga de traballo e se abra un «horizonte de esperanza e de futuro para os estaleiros españois».

    "Non podo entender como pon en cuestión que, despois de cinco anos de seca de contratos, agora veñan contratos que están asinados", respondeu aos socialistas, e sinalou que nos próximos días vai haber desprazamentos de técnicos a México para a súa concreción.

  • Os delegados de Navantia deciden finalizar o peche

    Os delegados sindicais de Navantia decidiron abandonar proximamente o peche que manteñen desde hai tres semanas no Concello de Ferrol despois de coñecer os acordos alcanzados na reunión celebrada esta mañá entre os sindicatos e a compañía, segundo asegura CCOO nunha nota de prensa.

    Nesta xuntanza, Navantia decidiu convocar a Comisión de Seguimento do Desenvolvemento do Sector Naval de Ferrol para o próximo 24 de outubro, co obxectivo de examinar e concretar os traballos precedentes que ocuparon á empresa.

    Navantia decidiu convocar a Comisión de Seguimento do Desenvolvemento do Sector Naval de Ferrol

    Logo de coñecer este acordo, os comités de empresa de Fene e Ferrol e os delegados das compañías auxiliares decidiron abandonar o peche "nos próximos días". Ademais, CCOO considera o encontro unha "excelente noticia" porque se decidiu actuar de forma conxunta "para resolver o novo sistema de bonificacións fiscais para o sector da construción naval", o coñecido como tax lease.

    A isto hai que engadir, segundo o sindicato, "a posta en marcha dun programa de traballo destinado a abordar as materias que afectan os estaleiros públicos e, en concreto, o que se refire ao convenio colectivo e ao plan industrial".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza