Pemex asina a compra do estaleiro Barreras

Guindastres do estaleiro Barreras, en Vigo CC-BY-NC-SA taburete

A petroleira mexicana Pemex vén de asinar co estaleiro Barreras "e os seus tres accionistas" unha carta de intencións onde se confirman os "termos e condicións básicas" que permitirán a adquisición da empresa galega por parte do xigante azteca a través dunha "achega de capital" que "permitiría a adquisición do 51% das accións desta compañía".

Así o asegurou xa a propia Pemex a través dun boletín oficial difundido na última hora do pasado mércores 1 de maio e que confirma a nova adiantada por Praza. A comunicación oficial aclara que está previsto que "a achega de capital a efectuarse en forma conxunta será inicialmente de dez millóns de euros", unha cantidade que a petroleira considera "suficiente para atender as necesidades de capital de traballo" e que permitirá tomar o control do estaleiro vigués a conta dos buques que se reciban. O actual presidente da empresa galega, José García Costas, manterase á fronte do estaleiro, segundo o pacto asinado.

Tamén Barreras, a través dun breve comunicado, confirma a sinatura dunha "carta de intencións" para a "posible adquisicón dunha participación financeira" da compañía por parte da petroleira mexicana, aínda que non aclara os termos do acordo e remite aos detalles que se coñecerán durante este mes de maio. A sinatura do acordo final é só cuestión de horas.

A inxección de capital de 10 millóns de euros será conxunta entre a petroleira e os accionistas de Barreras

O comunicado de Pemex si aclara que a achega da petroleira irá acompañada doutra por parte dos accionistas de Barreras, o que "fortalecerá a estrutura financeira do estaleiro español". Está previsto que a petroleira estatal achegue non menos do 60%. "Barreras está saíndo exitosamente dun proceso de concurso mercantil e agárdase que en poucas semanas reinicie as súas operacións", asegura, tras engadir que "se modificará e fortalecerá" o goberno corporativo do estaleiro vigués "incorporándose mellores prácticas a nivel internacional".

Na prensa mexicana destácase o beneficioso do acordo para Pemex, xa que "só por 180 millóns de euros" poderá facerse cun dos barcos floteis e ademais "controlar o estaleiro". A embarcación tiña un prezo fixado de 190 millóns, do que se lle descontan eses dez que permiten facerse coa compañía galega e co buque.

Segundo Pemex, o seu obxectivo con esta operación é "transferir a mediano prazo o coñecemento tecnolóxico de Barreras" para "crear capacidad construtora de buques especializados en México, co obxectivo de poder atender a demanda" da petroleira. "A flota é variada e nunha alta porcentaxe require modernizarse; coa transacción preténdese tamén acelerar o proceso de renovación da flota de barcos en xeral que serven á paraestatal", confirma.

"O acordo traerá beneficios ao sector naval mexicano e ao emprego en México", destaca Pemex

Pemex espera que o acordo "acelere a recepción de pedidos" e destaca que o presidente de Barreras, García Costas, está contento cunha alianza que fortalecerá a empresa e a industria naval en xeral. As autoridades da petreoleira estatal cren que o pacto "traerá beneficios ao sector naviero mexicano e ao emprego en México, ademais de preverse como un investimento con rendementos interesantes".

Pemex aclara que será a firma Athelera LLC a que exercerá como asesor financeiro nunha operación que será pechada "durante as próximas semanas". "Ambas as dúas partes traballarán nas partes finais do acordo e en lograr as autorizacións correspondentes", finaliza.

Símbolo dos estaleiros Barreras CC-BY-NC-SA Xosé Ramos

Despece

  • Feijóo di que o acordo Pemex-Barreras non exclúe o flotel para Navantia

    O presidente da Xunta, Alberto Núñez Feijóo, cre que o acordo entre Pemex e Barreras, polo cal a petroleira se fará co 51% do estaleiro galego, "supón beneficios para os traballadores do naval, para o sector na súa totalidade, incluíndo empresas auxiliares, e trae beneficios claros para Galicia". Segundo o xefe do Executivo, o control que a empresa mexicana fará sobre a firma viguesa "supón que os traballadores do naval no paro poidan empezar a traballar de forma inmediata na construción de dous floteis". "Vaise facer un na ría de Vigo e outro na de Ferrol", aclarou, malia que as informacións que chegan desde a paraestatal azteca non o deixan claro. "Estou convencido de que Navantia fará un flotel e Barreras o outro", insistiu.

    "Pemex cumpre; vaise facer un flotel en Vigo e outro en Ferrol", asegura Feijóo

    "O sector pasa de ter as gradas baleiras a ter capacidades exponenciais e ter carga de traballo da cuarta petroleira do mundo, que ten 25.000 millóns de dórales anuais de investimento", destacou Feijóo, que repara no feito de que Pemex "decida investir nos sectores que van mal, e non nos que van ben". "Barreras leva máis de 22 meses sen conseguir carga e traballo", lembrou. 

    "As empresas que están ben non necesitan apoio de ninguén. As que non teñen carga de traballo e levan 22 meses sen facer un barco e teñen dificultades para conseguir un aval para un barco xa contratado, necesita un socio estratéxico dende o punto de vista financeiro e de carga de traballo", xustificou o presidente da Xunta, que insistiu en que Barreras "non tiña capacidade para cumprimentar o aval", malia que ese era o único requisito ao que o Goberno aludía para xustificar o atraso no inicio dos traballos.

    "Barreras ten unha dificultade para conseguir un aval de 190 millóns de dólares, sen o que non se pode contratar ese barco [o flotel]", volveu dicir Feijóo, que pediu "prudencia"  para falar doutros pedidos "só cando se teña algo que dicir".

    "Quedo coa opinión dos sindicatos do naval e non coa de determinados políticos con praza en propiedade"

    "Comprendo que aquí todo é opinable, pero quedo coa opinión dos sindicatos do naval, que saben maís das dificultades do sector, que con determinados políticos con praza en propiedade", censurou Feijóo.

    "Non só o Goberno está cumprindo a folla de ruta con Pemex, senón que a estamos incrementando", presumiu o presidente da xunta, que desexa que "a capacidade de xeración de confianza no sector naval se poida ampliar a outros sectores". "A miña experiencia con Pemex é que cumpre os seus compromisos. Hai un compromiso para facer un flotel na ría de Ferrol e estou convencido de que cumprirá, a través do vehículo que posibilite a maior rapidez para o inicio do corte de chapa", insistiu, preguntado por unha promesa que acumula varios meses de atraso, xa que tanto o Executivo galego como o central aseguraran que se ían empezar os traballos hai varios meses. "Navantia fará un flotel e Barreras, outro", rematou.

    Feijóo, xunto ao presidente de México, Peña Nieto © Xunta

  • García Costas aclara que non haberá cambios na dirección

    A adquisición por parte de Pemex do control do estaleiro Barreras non implicará cambios na dirección nin no cadro de persoal, segundo asegura José García Costas, presidente da compañía e que seguirá á fronte dela. En declaracións á prensa, aclarou tamén que o acordo (a carta de intencións) foi asinado entre a petroleira e os tres principais accionistas da firma galega, Albacora, Baliño e Emenasa, sendo estas dúas últimas empresas propiedade do propio presidente.

    García Costas di estar moi satisfeito co acordo, pero non dá moitos detalles da operación, máis aló de que implicará carga de traballo.

    AGE, BNG e PSdeG critican a "desgaleguización" do tecido empresarial do país

    En canto aos partidos políticos, o BNG acusa a Feijóo de quedar "impasible" ante a "desgaleguización e esmorecemento" do tecido empresarial galego, mentres que AGE amosa a súa sorpresa polo feito de que a México lle interese "nacionalizar" Barreras e ao Estado non. O PSdeG cre a situación "un circo", mentres que Anova considera o acordo como "fame para mañá" e unha "mala noticia" para a compañía viguesa.

  • Miguel Pardo

    Miguel Pardo

    Entre A Coruña e o Ortegal. Antes en La Opinión, Depor Sport, L-V ou Xornal de Galicia. Co-autor de La imagen del mundo árabe y musulmán en la prensa española (2010, Fundación Tres Culturas)

  • David Lombao

    David Lombao

    Xornalista galego. De Lugo. Traballei e aprendín na Cadena SER, Radio Voz e Xornal de Galicia. Director de Praza.gal. 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza