Unha nova sentenza obriga NGB a devolver os cartos a dous afectados polas preferentes

Sentada dos afectados polas preferentes no Obradoiro Dominio Público @redenasa

O Xulgado de Primeira Instancia nº 9 da Coruña vén de ditar sentenza pola que estima a demanda de nulidade de venda de participacións preferentes interposta contra Novagalicia Banco por un matrimonio da cidade. O xulgado condena a entidade a devolverlles aos demandantes a cantidade que tiñan retida neste produto financeiro, 50.000 euros, incrementada ou disminuida pola diferencia entre os xuros legais do 4% anual desde a data da contratación e os xuros efectivamente percibidos polos demandantes durante a vixencia do contrato, así como a lles aboar as custas procesuais.

A sentenza considera probado que aos demandantes, clientes minoristas cun nidio perfil conservador e aforrador, foilles comercializado un produto de complexo e elevado risco. Os demandantes non foron informados sobre os elementos esenciais do negocio, nin tampouco advertidos de forma inequívoca sobre a asunción de riscos que puidesen ter permitido unha decisión racional. Velaí que o xulgado aprecia "erro substancial e excusable dos clientes ao contratar as preferentes", o que determina a nulidade do contrato por vicio do consentimento.

A sentenza entra a avaliar a natureza das participacións preferentes sinalando, ao efecto, que se tratan dun valor de carácter aleatorio e de máximo risco, maior incluso que o que deparan as accións ordinarias

A sentenza entra a avaliar a natureza das participacións preferentes sinalando, ao efecto, que se tratan dun valor de carácter aleatorio e de máximo risco, maior incluso que o que deparan as accións ordinarias. A diferenza das accións ordinarias, as participacións preferentes son un valor de capital “cautivo”, ao non ostentar o seu titular dereito político ningún a respecto da entidade, que puidera permitirlle participar no control do risco asumido.

Neste caso que vén de resolverse os demandantes non encaixan no tradicional perfil de arbitraxe de persoas con poucos coñecementos ou extrema vulnerabilidade

Neste caso que vén de resolverse os demandantes non encaixan no tradicional perfil de arbitraxe de persoas con poucos coñecementos ou extrema vulnerabilidade. A comercialización desta caste de productos híbridos en Galicia atinxiu a todo tipo de clientes minoristas (obreiros, profesores de instituto e de universidade, funcionarios, xornalistas, pequenos empresarios, etc), sendo en grande parte comúns os defectos de comercialización, que non requiren de xeito ningún un perfil de determinada idade ou de determinado baixo nivel de coñecementos.

Sentada dos afectados polas preferentes no Obradoiro Dominio Público @redenasa

Despece

  • O Valedor, "preocupado" polo peche das arbitraxes

    O Valedor do Pobo en funcións, José Julio Fernández Rodríguez, vén de amosar a súa preocupación por dous dos aspectos que están a ocasionar indefensión entre os afectados pola adquisión de participacións preferentes e obrigas subordinadas en Galicia. O alto comisionado parlamentario diríxese agora de novo á Consellería de Economía e Industria "alertado polo feito de que Novagalicia Banco teña pechada a vía da arbitraxe para os afectados desde o pasado 17 de xuño e pola ausencia de información aos clientes que resultaron rexeitados para optar a este sistema para recuperar os seus aforros".

    Amósase "alertado polo feito de que Novagalicia Banco teña pechada a vía da arbitraxe para os afectados desde o pasado 17 de xuño e pola ausencia de información aos clientes"

    O Valedor quere coñecer en primeiro lugar cal é a postura da consellería e máis en concreto do Instituto Galego de Consumo “sobre a circunstancia de que se fixe unha data pechada para a resolución da entidade sobre a aceptación ou non dunha solicitude de arbitraxe”. Segundo a defensoría, este comportamento resulta "contraditorio" co feito de que o proceso de arbitraxe é compatible cos mecanismos de troco e liquidez que afectan a eses produtos financeiros. “Entendemos nesta oficina do Valedor do Pobo que deben esgotarse os medios para que todas as persoas que investiron nestes produtos financeiros e que non foron informadas axeitadamente, ou mesmo foron enganadas, dispoñan dos mecanismos máis axeitados, como é a arbitraxe, para a satisfación das súas xustas pretensións”, apunta como obxectivo.

    “Entendemos nesta oficina do Valedor do Pobo que deben esgotarse os medios para que todas as persoas que investiron nestes produtos financeiros e que non foron informadas axeitadamente"

    A ausencia de información aos clientes que teñen a porta pechada para acollerse ás arbitraxes constitúe outro dos problemas para o Valedor. Ao respecto lembra que a Comisión de Seguimiento de Instrumentos Híbridos de Capital y Deuda procedeu en abril a determinar os criterios básicos que as entidades participadas polo FROB (incluída Novagalicia Banco) tiñan que aplicar para ofrecer aos seus clientes o sometemento á arbitraxe de consumo: “Consideramos neste sentido que ante ese Instituto Galego de Consumo deberíase facer constar por Novagalicia Banco que as solicitudes de arbitraxe que non foron aceptadas pola entidade non se axustaban nas súas diversas circunstancias aos criterios básicos expostos” explica o Valedor e engade que “doutra maneira entendemos que os afectados quedarían indefensos ante a eventual falta de transparencia na aplicación dunha normativa público-administrativa a unha entidade participada polo FROB”.

    O Valedor, nun acto público recente © Xunta

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza