0 Gardados para despois

De Guindos reduce por lei un 65% o soldo de Castellano

Lara GrañaLara Graña | @lara_grana


Segundo revés en menos de 24 horas para José María Castellano. O presidente de Novagalicia Banco coñeceu onte que a intención do Ministerio de Economía non pasa por dar máis tempo á entidade galega. Luis de Guindos quere desprenderse "o antes posible" do máis do 90% que o Estado ten no banco galego. Pero non houbo tempo para dixerir un anuncio que finiquita a aventura de Castellano e Alberto Núñez Feijóo. Este mediodía o Executivo anunciou que, ademais de data de caducidade, o proxecto de Novagalicia Banco ten un aliciente menos para seguir no seu equipo de dirección: o salario.

Ningunha entidade que tivera sido receptora de cartos públicos a cambio de accións poderá pagar máis de 300.000 euros ao ano aos seus directivos. Isto supón un recorte de máis do 65% nas remuneracións de Castellano e do seu número dous, César González-Bueno. Segundo información oficial da entidade galega, ambos os dous banqueiros teñen un salario base de 842.290 euros ao ano. Tendo en conta as dietas e outros complementos, os cartos que reciben de NGB superan os 899.000 e 891.000, respectivamente.

Resumo das retribucións en Novagalicia Banco
Nome Total retribución na entidadade Total no Grupo Total ano (miles de euros)
José María Castellano 899,29   899,29
César González-Bueno 889,64 1,54 891,18
Julio Fernández Gayoso 104,55 291,74 396,29
Mauro Varela 103,3 23,62 126,92
Roberto Tojeiro Rodríguez 30   30
Carlos González Fernández 35   35
José Manuel Gabeiras Vázquez 31,25   31,25
Xabier Alkorta 51,25   51,25
Jaime Trebolle 51,25   51,25
FROB 41,25   41,25
José Luis Regueiro 77,86   77,86
Miguel Argones 106,79   106,79
Juan Díaz Arnau 285,28   285,28
Francisco Zamorano 290,85   290,85
Francisco Vázquez de la Puerta 251,65   251,65
Domingo González Mera 260,38 25,87 286,25
Idoia Maguregui 246,61   251,65
Enrique Tellado 231,71   231,71
José Manuel Valiño 358,98   358,98
José Luis Abelleira 110,46   110,46
Ramón Seoane 287,76   287,76
Victoria Vázquez 397,48 140,98 538,46
José Venegas 487,21 9 496,21
Javier García de Paredes 10.599,00 19,36  

Outros tres directivos superan tamén o límite anunciado polo Goberno central. O caso de María Victoria Vázquez Sacristán, que tiña un soldo de máis de 538.000 euros, é rechamante. A directiva, única muller que formou parte do primeiro cadro de xestión de Novacaixagalicia, estivo involucrada nunha opaca inversión formalizada en Perú. Xa deixou a entidade, ao igual que Javier García de Paredes.

Unha fundación de carácter especial

Ademais da reducción salarial, o Goberno tamén imprime máis velocidade á desaparición de Novacaixagalicia como entidade de crédito. Agora mesmo é unha caixa que xestiona obra social, non o negocio financeiro, e que ten unha pequena participación en Novagalicia Banco. O plan inicial pasaba por elevar a cota de poder en NGB ata o 12%. Para seguir sendo unha caixa precisaría ter máis do 25% das accións do banco, algo que non sucederá.

Como fundación de carácter especial, Novacaixagalicia non renderá contas ao Banco de España, senón que o fará directamente á Xunta de Galicia. O Goberno galego prepara unha mellora da lexislación neste ámbito.

Coa túa achega fas posible que sigamos publicando novas coma esta.