Un chisco menos que seis meses antes, un pouco máis que o ano anterior e máis do duplo que ao comezar a gobernar. O Banco de España vén de publicar os datos oficiais de débeda pública coas que as autonomías pecharon o exercicio económico de 2013, unha análise que ratifica o rumbo ascendente do endebedamento da Xunta tanto en termos absolutos como no indicador preferido polo presidente do Goberno galego, o peso deste endebedamento sobre o produto interior bruto (PIB) do país.
A 31 de decembro de 2013 o erario autonómico galego acumulaba unha débeda de 9.131 millóns de euros, un 10,5% mais que os 8.261 millóns cos que pechou 2012. Esta cantidade volve situar a facenda galega no incremento da débeda tras dous baixadas puntuais, as experimentadas no segundo e no terceiro trimestre do ano, cando os 9.525 millóns de marzo pasaron a 9.324 en xuño e 9.104 en setembro. Así as cousas, Galicia debe agora 870 millóns máis que doce meses antes e 5.177 máis que en 2008, derradeiro ano xestionado integramente polo bipartito, o que supón un incremento do 130% dende o retorno do PP ao poder.
A Xunta debe 9.131 millóns, 870 máis que un ano antes
Os datos do regulador amosan que Galicia non é, nin moito menos, a autonomía máis endebedada do Estado pero tampouco lidera, nin de lonxe, o rexistro de contención da débeda, na liña do que viñeron manifestando os argumentarios oficiais nos últimos anos. Concretamente, a Administración galega é a sexta máis endebedada, lonxe dos postos de cabeza de Catalunya (57.000 millóns), Valencia (31.000), Andalucía (23.000) e Madrid (22.000), pero máis lonxe aínda dos apenas 1.000 millóns de La Rioja, dos 2.000 de Extremadura ou dos 3.000 de Asturias.
Peso sobre o PIB
Autonomías | % sobre PIB |
---|---|
Comunitat Valenciana | 32,9 |
Castilla-La Mancha | 31,6 |
Catalunya | 29,9 |
Balears | 25,6 |
Murcia | 20,9 |
Navarra | 17,6 |
Cantabria | 17,5 |
Andalucía | 17,3 |
Aragón | 16,6 |
Galicia | 16,6 |
Extremadura | 16,2 |
Castilla y León | 15,2 |
La Rioja | 14,7 |
Asturias | 14 |
Canarias | 13,2 |
Euskadi | 13 |
Madrid | 12 |
O peso da débeda sobre o PIB tamén era maior a finais de 2013 que un ano antes. O 16,6% que reflicte o Banco de España é 1,7 puntos máis que doce meses antes e case 10 puntos máis que en 2008. Así e todo, este indicador tamén estivo relativamente controlado ao longo do pasado ano, toda vez que ao remate do primeiro trimestre chegou, cun 17,3%, ao máximo da serie histórica.
En seis autonomías a débeda pesa menos na economía que en Galicia
Neste indicador Galicia tampouco é líder en control. Ben ao contrario, hai seis autonomías (Extremadura, Castilla y León, La Rioja, Asturias, Canarias, Euskadi e Madrid) nas que o endebedamento pesa menos sobre o conxunto da economía que en Galicia. Así e todo, ese peso é a metade que na primeira da lista, a Comunitat Valenciana, lastrada por un 32,9%. Nas finanzas do conxunto das administracións públicas do Estadi o panorama é moito máis complexo e a débeda xa chega ao 93,9% do PIB.