Galicia perdeu 1 de cada 5 empregos industriais dende o 2008

Porcentaxe de emprego industrial en cada concello (decembro 2016) Dominio Público Praza Pública

En xuño de 2008 traballaban en Galicia no sector industrial 219 mil persoas, segundo datos da Enquisa de Poboación Activa (EPA), e 210 mil seis meses despois. Hoxe fano 165.500 (dato da EPA do cuarto trimestre de 2016). A caída nestes oito anos é duns 54 mil empregos, algo máis do 20%. O punto máis baixo tivo lugar entre 2013 e 2014, cando se rozou o nivel dos 150 mil postos de traballo (unha caída de 68 mil) . Dende entón, a tímida recuperación do emprego permitiu gañar uns 14 mil, apenas dous de cada dez que foran destruídos.

A mesma evolución podemos observala noutro indicador, o que o ofrecen as cifras de afiliación á Seguridade Social, con datos por sectores económicos dende o 2009. En xuño de 2009 estaban afiliados e afiliadas case 159 mil traballadores e traballadoras no sector industrial galego. O número chegou a descender ata os 124 mil de decembro de 2014. Dous anos máis tarde, a recuperación foi moi tímida, sumando uns 6.500 novos asalariados e asalariadas. A caída do emprego industrial dende xuño de 2009 é do 18%.

A situación do sector podemos analizala tamén a través do Índice de Produción Industrial, con base 100 no ano 2010. O IPI acadou o seu valor máximo en decembro de 2006 (124.72), descendendo ata valores próximos a 80 entre o 2012 e o 2014. Dende entón, produciuse unha recuperación moi leve, que deixou o índice en 82.80 en decembro de 2016.

Segundo os datos da EPA, no primeiro trimestre de 2008 o 18,2% dos traballadores e traballadoras galegas estaban ocupadas na industria. Hoxe é o 15,8%, cunha leve recuperación dende o nivel mínimo acadado en 2013 (15,1%). Segundo a estatística da Seguridade Social o 13,9% dos afiliados e afiliadas traballan no sector industrial, consolidándose unha economía cun peso cada vez menor do sector secundario. 

Os datos de afiliacións fornecidos pola Seguridade Social permítennos observar en que concellos o emprego no sector industrial é máis importante. O sur da provincia de Pontevedra, Ferrolterra, A Coruña e Bergantiños, Caldas ou o Salnés son algunhas das comarcas nas que o emprego industrial supera a media galega. Por concellos, destacan nomeadamente Carballeda de Valdeorras, As Somozas, Valga, Salceda de Caselas, Pontecesures, O Barco e Salvaterra do Miño. Pola contra, hai 61 concellos nos que menos do 10% dos traballadores e traballadoras están ocupadas na industria, destacando nesta categoría o sur da provincia de Lugo.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.