Galicia desembarca no Intercéltico de Lorient encabezada por Uxía, Rodrígo Romaní e as seleccións de fútbol gaélico

Representación galega nunha das anteriores edicións do Intercéltico de Lorient Dominio Público Delegación Galega no Festival de Lorient

Dende hai case medio século o Festival Intercéltico de Lorient, na Bretaña, é punto de encontro case obrigado cada ano para as músicas e culturas das consideradas como nacións celtas. Galicia vén tendo un lugar destacado neste certame e unha ampla delegación galega volverá desembacara en Lorient do 3 ao 12 de agosto con músicos como Uxía ou Rodrígo Romaní á súa fronte, pero tamén coas seleccións de fútbol gaélico.

Uns 4.500 artistas e arredor de 120 espectáculos inzan un programa que, pola banda galega, abrirá o gaiteiro Anxo Lorenzo cun concerto de seu e tamén participando na "gran noite dedicada á gaita", resaltan dende a delegación de Galicia. Uxía levará ao Theâtre de Lorient o seu último traballo, Uxía-o, baseado en letras de Uxío Novoneyra. No caso de Rodrigo Romaní, prevé impartir unha clase maxistral de arpa antes de presentar o seu traballo Fíos de ouro no ar no pazo de congresos da localdade bretoa.

O gaiteiro Anxo Lorenzo, a banda Sons da Chaira ou o grupo de baile Saíñas forman parte tamén da delegación galega

A participación dos gaiteiros Xesús Rodríguez, Manuel Seoane, Diego Prieto e Raquel Vilas no Trofeo McCrimmon de gaita peninsular, o espectáculo da Banda de Gaitas Sons da Chaira ou o baile dos mariñaos Saíñas serán outras das achegas galegas dun festival que, ademais, ten unha expectativa adicional para Galicia. Resaltan dende a delegación que "durante o festival se anunciará o país celta ao que se lle dedicará a edición de 2019" tras o protagonismo en 2018 do País de Gales. "Galicia -aseguran- está entre as grandes candidatas".

Integrantes das seleccións galegas de fútbol gaélico / Selección Galega de Fútbol Gaélico

Alén da música, o Intercéltico de Lorient trae tamén consigo unha nova participación internacional das seleccións galegas masculina e feminina do fútbol gaélico. Será na recta final do festival, dende o día 11, e os combinados galegos xa preparan os seus encontros dende hai semanas en diversas sesións de adestramento.

Pavillón de Galicia nunha das anteriores edicións do festival Dominio Público Festival Intercéltico de Lorient

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.