0 Gardados para despois

O guerrilleiro Antonio Pérez Barreiros, centro da homenaxe ás vítimas do franquismo en Verín

Redacción | @prazapublica

Nacido en Ourense en 1928 e finado en Verín en 2012, Antonio Pérez Barreiros foi un dos derradeiros guerrilleiros galegos vivos, o penúltimo se cadra, se temos en conta a figura de Camilo de Dios. A homenaxe a Pérez Barreiros será un dos actos centrais da III Homenaxe ás Vítimas do Franquismo na Comarca de Monterrei, que os próximos días 11, 12 e 13 de agosto se celebrará en Verín, organizada pola CIG. O evento, que dá continuidade aos xa realizados en 2011 e 2015, complétase coas presentacións de dous libros e dun filme.

Antonio Pérez Barreiros foi un dos derradeiros guerrilleiros galegos vivos, o penúltimo se cadra, se temos en conta a figura de Camilo de Dios

O doingo 13 ás 22 horas a Praza da Mercé acollerá o Acto de Homenaxe ás Vítimas do Franquismo, que consistirá nunha glosa da figura do guerrilleiro Antonio Pérez Barreiros, na que participará a súa viúva, Isabel do Barrio. Podemos ler na Galipedia que Pérez Barreiros, xa con oito anos de idade repartía en bicicleta propaganda contra a ditadura pola rúa do Paseo de Ourense. Cando rematou a guerra afiliouse ás Juventudes Socialistas Unificadas, nas que militou na clandestinidade, polo que foi detido e encarcerado no cárcere de Ourense, do que logrou fuxir. En 1946 fuxiu ás montañas e integrouse nun destacamento da II Agrupación do Exército Guerrilleiro de Galicia dirixido por Juan Sorga con Camilo de Dios Fernández, Manuel Novoa e José María Saavedra Díaz.

O 18 de marzo de 1949 formaba parte do grupo de seis guerrilleiros localizados pola Garda Civil nunha casa que utilizaban como refuxio preto de Ourense. Nun primeiro asalto os guerrilleiros lograron repeler o ataque e mataron dous gardas, finando tamén o guerrilleiro Antón López. Antonio Pérez resultou gravemente ferido e foi capturado (xunto con Camilo de Dios). Xulgado nun consello de guerra celebrado na Coruña o 27 de agosto de 1949, foi condenado a morte. Foi trasladado ao cárcere de Burgos onde coñeceu á súa dona. Conmutada a pena pola cadea perpetua, foi trasladado ao penal do Dueso (Santander), do que saíu a finais dos anos sesenta, para instalarse definitivamente en Verín, sendo detido de novo en 1971 por repartir propaganda ilegal.

 

O programa

O evento, que dá continuidade aos xa realizados en 2011 e 2015, complétase coas presentacións de dous libros e dun filme

Os actos comezarán o venres (20 horas, Salón de Actos da Casa da Cultura de Verín), coa presentación do libro O futuro é para sempre, a cargo do Secretario da CIG de Verín e A Limia: Luís Ferreiro, con coloquio coa autora, a antropóloga portuguesa Paula Godinho. A publicación trata sobre os mecanismos socialmente construídos polas poboacións das comarcas raianas entre Portugal e Galicia para a resolución dos seus problemas cotiáns. Entre outros, dedícase todo un capítulo ás traballadoras téxtiles de Verín, no que se analizan os seus modos de comportamento e as súas relación sociais e laborais.

O sábado, á mesma hora e no mesmo escenario, presentarase o libro Os nomes do terror, coordinado polo historiador Dionisio Pereira, que manterá un coloquio con Luís Ferreiro. O libro sinala as identidades, historias, miserias e crimes dos elementos fascistas que protagonizaron os asasinatos derivados da represión franquista.

O domingo (22 horas, praza da Mercé de Verín), trala devandita homenaxe ás vítimas do franquismo, proxectarase o filme Silênciorealizado polos portugueses António Loja Neves e José Manuel Alves Pereira, que narra os acontecementos que tiveron lugar en 1946 no Cambedo da Raia (Chaves). O 21 de febreiro daquel ano, a aldea do Cambedo da Raia, a poucos metros de Galicia, foi cercada e atacada pola Garda Civil española, polo Exército portugués, pola Garda Nacional Republicana e pola PIDE. Dous guerrilleiros morreron, un cativo foi ferido e varios casas foron destruídas na procura por parte das autoridades españolas e lusas dun comando de guerrilleiros galegos que alí se agochaban. A vila de Cambedo da Raia perdeu por máis dun ano a 18 dos seus habitantes, presos no cárcere do Porto preventivamente ata o xulgamento que tivo lugar en decembro de 1947. O filme lembra o sucedido, recollendo as testemuñas das persoas da aldea que ficaron por 50 anos obrigadas ao silencio, sen poderen falar deste episodio tráxico.

Coa túa achega fas posible que sigamos publicando novas coma esta.