Galiza Nova celebrou este venres 12 de outubro un acto reivindicativo contra a monarquía española e a prol do dereito de autodeterminación. Na concentración, que tivo lugar na Praza 8 de marzo de Compostela, foi queimado un espantallo caracterizado como Felipe VI. O secretario xeral da organización xuvenil do BNG, Alberte Fernández, destacou que a queima simbólica do boneco coa imaxe do rei de España constitúe un “acto de defensa da liberdade de expresión, contra o réxime e todo o que representa queimando simbolicamente a monarquía española, que se mostra orgullosa no día de hoxe do xenocidio cometido en América Latina”.
Galiza Nova celebrou este venres 12 de outubro un acto reivindicativo contra a monarquía española e a prol do dereito de autodeterminación
Na súa intervención, Fernández aludiu tamén ao ditador Francisco Franco, lembrando que foi este quen “decidiu deixar a Xoán Carlos I como o seu sucesor”, quen -engadiu- “representa a continuidade do franquismo”. Afirmou ademais que "fronte á institución da monarquía blindada pola Consitución Española", o nacionalismo galego "tivo sempre clara a súa postura contraria: o proxecto do BNG é o da soberanía, partindo das Bases Democráticas que presentamos o ano pasado". Fernández referiuse igualmente ao movemento soberanista catalán, afirmando que o Estado español “reprime os movementos de liberación nacional, chegando ate a violencia física, e cun xefe do estado que parabeniza aos policías que participaron nas cargas masivas do 1-O”.
O secretario xeral de Galiza Nova concluíu indicando que a queima deste boneco representaba “todo o que queremos rachar, para poder construír unha sociedade nova na que teñamos un traballo e ensino dignos, os dereitos das mulleres e as persoas LGTBI estean garantidos; así coma a liberdade de expresión, e na que poidamos vivir plenamente na nosa lingua”.
A queima constitúe un “acto de defensa da liberdade de expresión, contra o réxime e todo o que representa", destacou o secretario xeral de Galiza Nova
No acto tamén interviu Navia Rivas, integrante da Dirección Nacional de Galiza Nova, que destacou que “Galiza non é Hispanidade. Galiza é loita. Loita obreira e loita nacional, que son a mesma”. Subliñou ademais o compromiso da organización xuvenil “co pobo galego, no noso compromiso por unha Galiza cos ollos no porvir, solidaria, republicana, laica, xusta, feminista, soberana”.