O movemento de indignación que comezou aquel 15 de maio de 2011 achégase aos dous anos. Dende entón, o paro non deixou de subir, continuaron os desafiuzamentos, consumouse o multimilonario rescate bancario -que de paso completou o proceso de eliminación das caixas de aforros- e un cambio de goberno intensificou os recortes e a execución da politica económica recomendada polo BCE e o FMI. Todo, nun escenario marcado pola multiplicación dos casos de corrupción e a intermitente pero continuada mobilización da cidadanía.
Que cambiou, logo? Ou que cambiou para ben nestes últimos 21 meses? Pois se cadra o que mudou foi a conciencia colectiva dos culpables desta situación e da base do problema. E tamén se pode concluír que nestes case dous anos se produciu unha ruptura dos consensos previos, da confianza, no bipartidismo, nos medios de comunicación e nas versións oficiais. É por iso que hoxe se acepta con normalidade o lema de Contra o golpe de estado financeiro para as manifestacións convocadas este 23 de febreiro en toda España. 23F, si, facendo explícita a coincidencia e poñendo de novo a reclamación da democracia e da democracia real en primeiro plano. As marchas están convocadas pola Marea Cidadá, un conxunto de organizacións politicas, sociais, sindicais, asembleas do 15M e plataformas cidadás de todo tipo, poñendo o énfase na defensa dos servizos públicos e dos dereitos sociais.
Pódese dicir que se multiplicaron os ataques pero tamén as respostas, como lembra o colectivo Robin Hood da Coruña: "baixo este mandato neoliberal non elexido pola cidadanía, o intento de desmantelamento do público, coa ofensiva contra a Sanidade a Defensa universal ou a Educación, os ataques constantes ó medio ambiente, os dereitos laborais e sociais ou o desemprego son xa elementos cotiáns na nosa cidade. Poren, tamén o son as respostas cidadás".
"En 1981 a cidadanía saíu á rúa a expresar o seu rexeitamento rotundo ao golpe de estado militar. O sábado 23, 32 anos despois, sairemos á rúa a defender os nosos dereitos e a rexeitar os recortes e as brutais políticas de axuste coas que se canalizan fondos para satisfacer a avaricia dos mercados financeiros e políticos corruptos". Deste xeito chama á cidadanía o Movemento Veciñal a Prol dos Bens Comúns de Marín e textos e chamamentos semellantes podemos atopar nos manifestos difundidos por outras asembleas cidadás que convocan ás marchas do sábado. Baixo a proclama de "Non ó golpe de estado financeiro. Non debemos, non pagamos" as manifestacións pedirán xustiza social e ambiental, transparencia e democracia participativa, a defensa duns servizos públicos e universais, e unha auditoría cidadá da débeda en protesta contra "a débeda ilexítima".
Converxencia de reivindicacións
"Chamamos a confluencia de aqueles colectivos e persoas que nos vemos violentamente afectadas polas políticas de recortes e polo saqueo do público que se está a exercer desde o poder político institucional"
Nas manifestacións confluirán outras reivindicacions. Na marcha de Pontevedra denunciarase o ataque ao ensino: "priorizan o lucro sobre o dereito á educación e sobre a vida das persoas. E esta situación repítese na xustiza, no transporte ou na vivenda" e tamén pedirase o traslado da planta de ENCE, de novo de actualidade pola reforma da Lei de Costas, ou a paralización do proxecto eólico do Morrazo.
Pero tamén se criticará a limitación do debate nos Parlamentos a lei electoral ou o proceso de recentralización: "non aceptamos que o goberno do estado e a Xunta de Galicia fagan demagoxia aproveitando o descontento coa clase política para reducir aínda máis a calidade democrática, eliminando representantes, capacidade de decisión local e silenciando minorías; nin unha lei electoral inxusta que favorece e beneficia o bipartidismo e aos grandes partidos, e que torna ilexítimas as accións dun goberno que, ademáis, non pode ter un cheque en branco durante catro anos para gobernar de costas ao pobo baixo a dictadura de maiorías aritméticas". Entre as esixencias figura tamén a posta en marcha dun proceso constituínte: "esiximos maior capacidade de decisión, participación e control popular; a dimisión do goberno e a posta en marcha dun proceso constituínte radicalmente democrático, previo exercicio do dereito a decidir dos pobos, que conclúa cunha nova Constitución baseada na democracia real"
Os propios organizares fan fincapé nesta converxencia de reivindicación, como por exemplo no manifesto da mobilización da Coruña: "Chamamos a confluencia de aqueles colectivos e persoas que nos vemos violentamente afectadas polas políticas de recortes e polo saqueo do público que se está a exercer desde o poder político institucional. E chamamos, en definitiva, a tomar as rúas este 23F: Contra a corrupción, por unha saída social a crise, contra a débeda ilexítima, as políticas neoliberais, os recortes e, ao cabo, pola construcción dunha cidade e unha sociedade baseadas na igualdade e na xustiza social". A converxencia farase explícíta na Coruña o sábado, pois os organizadores da marcha chaman a participar previamente na manifestación convocada polos afectados pola estafa das preferentes.
Horario das manifestacións
A Coruña. 12.30. Do Obelisco á Delegación do Goberno e a sede do PP
Pontevedra. 17.30. Praza de España
Compostela. 18.00. Praza do Toural
Ourense. 18.00. Dende a Praza Maior até a Subdelegación do Goberno.
Vigo. 18.00. Dende a Praza de España até a Porta do Sol
Ferrol. 18.00. Edificio Administrativo Xunta de Galicia, Praza de España.
Lugo. 19.00. Praza Maior
Redondela. 20.00. Praza da Constitución
Vilagarcía de Arousa. 20.30. Concello