0 Gardados para despois

Daniel Fernández López

Quéimannos e imos dicir que arde

«Galicia non arde, a Galicia quéimana». Quéimannos os xa chamados "terroristas incendiarios", quéimanos o mal tempo, Ophelia, as circunstancias adversas para poder controlar e apagar o lume, e —segundo insinuou o presidente Feijóo— quéimanos a nosa irmá e veciña, Portugal, que "non é quen de controlar os seus lumes". O goberno galego preséntase como unha vítima máis das lapas.

O xeito de dispoñer o discurso por parte do presidente é moi interesante. No apartado de loubanzas comezou esta mañá (luns), en primeiro lugar, polas forzas e corpos de seguridade do Estado: bombeiros, policías estatal e local, Garda Civil, UME... Unha énfase notable en resaltar o seu bo traballo, que de seguro o foi, aínda que as cousas moi boas adoitan venderse soas. Quizais o traballo dos profesionais foi excelente pero os medios e o número escasos? Habémolo saber ó longo destes días. De tódolos xeitos quedaron os veciños para máis tarde nese discurso. Os veciños, os cidadáns galegos, os verdadeiros heroes en moitos dos casos desta noite e a xornada de onte. Coma en Angrois. Coma no Prestige. Unha mención bastante fría e pouco destacada na comparecencia institucional. E ollo ó concepto de "terrorista incendiario", porque o termo "terrorista" implica semanticamente "non controlable, inesperado", e polo tanto suxire unha vez máis a ausencia de responsabilidade das autoridades e o goberno do país, aparte de ser unha palabra que fabrica votos.

Vemos, logo, como o presidente galego trata xa desde onte á noite de botar balóns fóra sutilmente, presentándose como unha vítima e evitando calquera tipo de relación ou contacto coa responsabilidade: o clima, Portugal, os terroristas... As preguntas son: que interese hai en prender lume? Que beneficio sacan os que o fan? Arderon zonas ameazadas polos proxectos devastadores de megaminaría contaminante contra os que a poboación galega estaba protestando (nos Ancares, por exemplo), pode ter algo que ver? As instalacións e o cableado de alta tensión de Fenosa querían facelos pasar por As Neves e Arbo, pero eran territorios protexidos que agora son cinza, pode estar relacionado? Hai algo que os nosos gobernos, galego e estatal, puidesen ter feito para previr ou solucionar esta situación e que non se fixese? Algo a nivel lexislativo (modificación e creación de leis) ou executivo (organización e funcionamento dos operativos anti-incendios (brigadas, bombeiros...), vixiancia, limpeza de montes...)?

Vai ocorrer coma co Prestige, onde non houbo ningún tipo de responsabilidade política?

Acerca de Daniel Fernández López

Daniel Fernández López, nado en Lugo no 1994, estuda actualmente 4º curso do Grao Superior de Música na especialidade de Instrumentos da Música Tradicional e Popular e 2º curso do Grao en Lingua e Literatura