Nengum momento é bom para deixar a casa paterna. Dous fórom os filhos que decidírom abandonar a casa comum do BNG, nunca demasiado confortável mas de teitos sólidos e com quartos individuais. Quando chega o momento de partir um sempre leva algo entranhável de incerta utilidade na mochila.

Anova parece ter carregado com o assemblearismo e o altermundismo como vultos maiores. A assembleia como disfarce do partido guia e o altermundismo como referência ao anti imperialismo de toda a vida

Anova, um dos irmaos separados, parece ter carregado com o assemblearismo e o altermundismo como vultos maiores. A assembleia como disfarce do partido guia e o altermundismo como referência ao anti imperialismo de toda a vida. Valores tradicionais da casa, em definitiva. A convivência política produz hábitos de dependência difíceis de superar, de passar à eleiçom das orquídeas silvestres frente a Trotsky em memorável parábola de Rorty¹.

CxG deixa a casa mais ligeiro de equipagem. A recta doutrina e os ritos de confirmaçom pesam pouco na sua mochila. Há mesmo umha certa vontade de profanaçom mui própria das rupturas familiares

O outro irmao, Compromiso, CxG, deixa a casa mais ligeiro de equipagem. A recta doutrina e os ritos de confirmaçom pesam pouco na sua mochila. Há mesmo umha certa vontade de profanaçom mui própria das rupturas familiares. Anova tem saudades dum suposto projecto comum genuíno; CxG aponta para o pragmatismo: um enterro digno da dogmática binária de classes, um abaixamento da fronteira esquerda/direita, tam ténue em Europa. Som estas posiçons habituais nos nacionalismos maioritários catalam e basco como foi na tradiçom fundacional do galeguismo. Na actual circunstáncia, o discurso que ensaia CxG aponta cara umha convocatória de amplo espectro a umha sociedade de classes médias. Nasce em definitiva do cepticismo generalizado ante as quimeras históricas do passado século e as promessas da emancipaçom definitiva. A consigna de classe contra classe, que atavia ainda os discursos, fora liquidada já de facto quando as frentes populares: a primeira concessom da história sagrada à história real.

As tarefas para transformar vida e sociedade som, nom obstante, improrrogáveis e de crescente dificuldade também. O cámbio real opera agora em blocos, a Uniom Europeia em primeiro termo. A pobreza e os imperativos de equidade e respeito ao médio adquirírom dimensom planetária. Pragmatismo e internacionalismo som componentes de qualquer proposta transformadora verosímil. Na tradiçom política europeia a ferramenta de mudança chama-se social-democracia e os seus objectivos distam muito de se terem cumprido: coeson social, equidade distributiva, controlo do mercado, luita sem quartel contra o roubo institucionalizado e o privilégio.

Admira ver como se invoca o legado de Keynes como antídoto único ante os efeitos destrutivos da crise capitalista que nos atenaza. Pura social-democracia sem alternativas visíveis. Fora do círculo das utopias antecipatórias nom faltam alternativas transformadoras à par da social-democrata como as ancoradas no pragmatismo filosófico de tradiçom anglo-saxónica que podemos observar em modelos de democracia inclusiva como o do professor de Harvard e ex-ministro do Brasil Roberto Mangabeira² ou no mesmo discurso de Rorty. Também na tradiçom do radicalismo republicano. Ancho é o campo do pensamento crítico.

Som muitos votos para forças precárias e inexpertas e também para as resistentes como EU, obrigada a superar a carência de discurso nacional e a debilidade da implantaçom

Anunciam-se comícios eleitorais para o 21 de Outubro. O calendário da esquerda emergente vai entrar no acelerador de partículas. A exigência do 5% marca um imperativo inexorável: concentrar forças; Anova e CxG primeiro, EU imediatamente despois. O voto a emitir em Galiza, 1.700.000 em cifras redondas, situa a barreira do 5% em torno aos 33.000 votos na Corunha, a 28.000 em Ponte Vedra e a algo mais de 11.000 em Ourense e Lugo. Som muitos votos para forças precárias e inexpertas e também para as resistentes como EU, obrigada a superar a carência de discurso nacional e a debilidade da implantaçom. Transformar simpatia em votos nom é fácil e os inquéritos confirmaram-no.

O primeiro dever da esquerda nascente é alcançar representaçom parlamentar aproveitando ao máximo a atençom da opiniom pública informada e, sobre todo, da comprometida com o futuro do nacionalismo que se mantém extramuros do BNG. Superar o cepticismo abstencionista e concentrar o voto reflexivo ou desconforme da mocidade que saiu à rua a pedir mudança em modos e prioridades exige um discurso renovado e generoso em compromissos explícitos e parco em retórica partidária. A escassez de meios pode paliar-se com umha campanha austera e a solicitude de colaboraçom: a austeridade casa bem com os tempos e os modos requeridos.

As promessas claras, verificáveis e concretas: rotaçom na representaçom durante a legislatura, coordenaçom desta mediante um conselho político permanente e plural aberto à presença cidadá. Compromisso firme de tentar consolidar umha organizaçom política de novo cunho durante a legislatura, comprometida na apertura de canles á energia social represada. Rendiçom periódica e pública de contas, propósitos e obstáculos.

Um fracasso no propósito de alcançar representaçom produziria dous frutos amargos: 1) defraudar a esperança social num horizonte de renovaçom social e nacional 2) restar representaçom ao BNG

É preciso preservar a mensagem de mudança da altissonáncia vácua (anticapitalismo, autodeterminaçom). Estamos em eleiçons, falamos-lhe à gente. Um fracasso no propósito de alcançar representaçom produziria dous frutos amargos: 1) defraudar a esperança social num horizonte de renovaçom social e nacional 2) restar representaçom ao BNG, um acontecimento que por riba poderia utilizar-se para desqualificar todo antagonismo interno em detrimento da lenta a necessária renovaçom do Bloco. A eventual perda de presença parlamentar do BNG por motivo da coaligaçom nascente nom seria talvez mal recebida pola direcçom do BNG em aras da blindagem definitiva do seu status de partido único do nacionalismo.

A inquietude criativa que agita ao nacionalismo, em afortunado contraste com a atrofia senil que transmite o bipartidismo decrépito, merece boa sorte. Desejamos-lha em espera de que saiba merecê-la com comportamentos adequados à altura das circunstáncias.

(1) Rorty, Richard (1998): “Trotsky e as orquídeas silvestres” em Pragmatismo y política, Ediciones Paidós, Barcelona.

(2) Mangabeira Unger, Roberto (2010): La alternativa de la izquierda, Fondo de Cultura Económica, Argentina.