Teoria da relatividade (e IV)

Se como comentei hai uns dias no caso de CxG e AGE pode resultar dificil tomar umha decisom em base a afinidades ideológicas por estas candidaturas serem combinados em que militam persoas e colectivos de mui diferentes procedências, e se tampouco resulta fácil guiar-se por indícios externos já que os seus feitos nom nos proporcionarom ainda umha base sólida para valorar a sua solvência, também nom faltam interrogantes no que ao BNG di respeito.

Neste caso as dúvidas nom decorrem do feito de se tratar dumha convergência eleitoral de trajectórias heterogêneas senom do feito de se terem produzido nos últimos tempos algumhas mudanças na sua composiçom e estratégia que abrirom um processo cujos resultados podem distanciar sensibilidades até agora afins ao BNG e sintonizar com outras que antes se mantinham  afastadas.

 


As interrogantes do BNG

Os primeiros resultados do BNG foram conseguidos sobre a memoria do grande potencial mobilizador que tivera na década de setenta o nacionalismo agrupado na AN-PG, o ascenso eleitoral posterior foi fruto sem dúvida das técnicas de marketing a que se recorreu eficazmente nas décadas seguintes

O conhecido abandono de persoas às que os resultados das votaçons da assembleia celebrada em Ámio nom parecerom satisfatórios e a incorporaçom doutras -sem dúvida menos numerosas e com menor projecçom mediática, que nom social- som feitos que alteram, em mais dum sentido, o funcionamento do BNG e a imagem que este projecta na sociedade.

Por outra parte, a nova deriva da frente, orientada a acentuar a importáncia do trabalho ligado à mobilizaçom social e a restar protagonismo aos processos eleitorais, modifica o sentido da trajectória que anos atrás lhe acarretara notáveis benefícios.

Porque, se bem é verdade que os primeiros resultados do BNG foram conseguidos sobre a memoria do grande potencial mobilizador que tivera na década de setenta o nacionalismo agrupado na AN-PG, o ascenso eleitoral posterior foi fruto sem dúvida das técnicas de marketing (o detergente que lava mais branco) a que se recorreu eficazmente nas décadas seguintes. O que deu lugar a umha situaçom até esse momento inêdita no nacionalismo de base popular: a frente foi ganhando votos em sectores nom nacionalistas ao tempo que perdia vigor reivindicativo e firmeza na defensa dos sus mais evidentes sinais de identidade. Perdas que tardarom em ser percebidas por a miragem do êxito eleitoral embaçar durante um tempo a visom da realidade. Até o feitiço mostrar as primeiras fendas.

O esforço militante, o resultado das eleiçons posteriores e a experiência do bi-partido -com os seus erros, acertos e o subseqüente fracasso eleitoral- figerom o resto

Os factores que contribuírom a rachar o feitiço forom diversos. Entre eles, em lugar destacado, um acontecimento que por razons judiciais estes dias ganha actualidade. Quando hai agora dez anos o Prestige parte e provoca a bem conhecida catástrofe, o BNG comprova que tem dificuldades para reagir com a rapidez e contundência que requer umha calamidade destas dimensons. E descobre que as túrbias negociaçons do que na altura era o seu líder com o que na altura era o  líder do PP som importante obstáculo para actuar rápida e contundentemente. O esforço militante, que supriu as carências dumha direcçom confusa e impulsou rapidamente a mobilizaçom popular, o resultado das eleiçons posteriores e a experiência do bi-partido -com os seus erros, acertos e o subseqüente fracasso eleitoral- figerom o resto. O BNG optou por rectificar o rumo e escolheu um novo candidato para representar a mudança.

Em que medida e em que sentido este ressurgir dumha tradiçom militante que enraíza nos anos setenta determinará os resultados? Em que medida e em que sentido influirá nesses resultados o perfil do novo candidato?

Estes som ao meu ver os feitos que abrem as interrogantes sobre o resultado, em termos eleitorais, dos novos tempos do BNG, sobre o número e a procedência dos apoios que receberá o 21-O. Em que medida e em que sentido este ressurgir dumha tradiçom militante que enraíza nos anos setenta determinará os resultados? Em que medida e em que sentido influirá nesses resultados o perfil do novo candidato?

Jorquera apresenta-se ao eleitorado como o homem trabalhador e militante que retratou o seu predecessor (Anxo Quintana) num elegante artigo publicado hai um par de meses. Mas este perfil pode nom impressionar votantes que escolhem o detergente polo desenho da embalagem. De feito, umha experta em comunicaçom como Patrycia Centeo, extasiada polo look  sofisticado doutros candidatos (Feijóo, Conde, Beiras),  define a de Francisco Jorquera como umha imagem "que non comunica nada".

Conseguirá o BNG equilibrar esta recuperaçom do impulso reivindicativo com a razoável abertura a sectores mais inclinados à necessária acçom política institucional?

E umha pergunta para mais adiante: conseguirá o BNG equilibrar esta recuperaçom do impulso reivindicativo com a razoável abertura a sectores mais inclinados à necessária acçom política institucional?

Haverá quem tenha observado que nom entro a valorar afinidades ideológicas. A razom é que, ao meu ver e com diferença ao que acontece nos casos a que me referim em artigos anteriores, o carácter inequivocamente nacionalista do BNG escusa o exame.

Fico no entanto com a dúvida de se terei sido capaz de argumentar convincentemente a favor da necessidade de activarmos os mecanismos de reflexom antes de decidir a quem daremos o voto

Fico no entanto com a dúvida de se terei sido capaz de argumentar convincentemente a favor da necessidade de activarmos os mecanismos de reflexom antes de decidir a quem daremos o voto.

Se nom o logrei, o fracasso haverá de ser atribuído a minha condiçom de homem do país. "El gallego", revelou hai uns dias um eloquente político de Ciudad Real que andou de gira eleitoral por Galiza, "es como muy callado." "En el sentido" -esclareceu- "de tener cosas en la cabeza que a veces les cuesta expresar o trasladar al exterior" (Cayo Lara, Coordinador de Izquierda Unida, deputado por Madrid).

 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.