A Xunta gábase da caída das baixas laborais no seu persoal

Reunión do Consello da Xunta deste xoves © Xunta

Menos baixas e máis fachenda. En tempos de crise o Goberno galego, como moitos outros, atopa menos motivos para facer comparecencias públicas en clave de orgullo e este xoves atopou un. A conselleira de Facenda presentou ante o Consello da Xunta un informe sobre o número de baixas laborais do persoal ao servizo da Administración autonómica e o resultado é, segundo o Executivo, altamente positivo. Tanto que o propio presidente, Alberto Núñez Feijóo, non dubidou en parabenizar e "agradecer a concienciación, complicidade e profesionalidade dos empregados públicos", porque no primeiro trimestre as baixas caeron un 17%.

O Goberno galego decidiu penalizar economicamente as baixas médicas do seu persoal cunha orde en vigor dende o pasado 7 de maio

Pero no agradecemento presidencial mestúranse dous conceptos. Se ben o informe de Elena Muñoz se refire ás baixas Feijóo ve "constatado" un "maior compromiso, maior eficiencia e produtividade" do persoal público o que, di, derivou nunha "notable redución do absentismo". De "absentismo" e non de "baixas" fala tamén á hora de cuantificar o aforro en que derivaron estas cifras: 3,9 millóns de euros. Alén do vocabulario, Facenda rexistrou un total de 2.163 baixas iniciadas nos primeiros tres meses do ano, "descenso que tamén foi maior comparando o mes de marzo de 2012 co mesmo período do ano anterior, cunha diminución do 48,4%". "Ademais -abonda-, o nivel de absentismo foise reducindo de maneira progresiva ao longo desta lexislatura ata un 27,1%".

Ni as explicacións de Facenda nin as do presidente entran a valorar as posibles causas da redución de baixas nun contexto no que a súa regulamentación está a ser cambiado. Non en van, este significativo recorte producíase mentres o Goberno galego decidía penalizar economicamente as baixas médicas, recollendo o estipulado na lei de medidas temporais en determindas materias do emprego público. Nomeadamente, nas baixas vinculadas a "enfermidades comúns ou accidentes laborais" os empregados pasan a recibir "un complemento ata acadar o 50% das súas retribucións cando sexa a primeira baixa do ano natural", a porcentaxe baixa ao 40% na segunda baixa "no mesmo ano" e, se se producen máis, "non se abonará o devandito complemento". Estes e outros recortes, en vigor dende o 7 de maio, fan prever que a tendencia das baixas continúe a ser descendente nos vindeiros meses.

Homologación do persoal laboral fixo da Administración paralela

Tamén sobre función pública, o Consello daba luz verde este xoves ao decreto que, en virtude da Lei de Administración Pública, "homoxeneiza as relacións de emprego en todo o sector público autonómico". Segundo esta norma durante "un prazo máximo de seis anos" equipararanse todas as condicións laborais dos traballadores fixos dos diversos entes dependentes da Xunta ao establecido no Convenio Colectivo Único da Administración autonómica. Nesta norma que, destaca Feijóo, ten o visto e prace de "todos os sindicatos, agás a CIG", estipúlase que se equipararán as condicións con "contrato laboral fixo con algunhas das entidades instrumentais do sector público, formalizado tras un proceso de selección realizado baixo os principios constitucionais de publicidade, mérito e capacidade", tendo ademais que "acreditar" a  "titulación e os demais requisitos para o acceso ao grupo e á categoría" correspondentes.

Reunión do Consello da Xunta deste xoves © Xunta

Despece

  • San Xoán, festivo para "mellorar a economía"

    "Por fin", "reivindicación histórica", "eran horas!". Foron algúns dos comentarios que comezaron a circular polas redes sociais de Internet despois de que este xoves o presidente da Xunta fixese pública a decisión do Goberno galego de modificar o calendario laboral introducindo, entre outros axustes, a novidade de que no ano 2013 o día de San Xoán sexa festivo. Pero a decisión do Executivo non virá motivada polos desexos de milleiros de coruñeses que cada ano reclamaban poder gozar das fogueiras nas praias na noite do 23 de xuño sen ter que madrugar o día 24. Tampouco responde ás reivindicacións de múltiples comisións de festas e asociacións veciñais e culturais que ao longo do país veñen reivindicando dende hai anos que unha das festas máis tradicionais de Galicia, xa sexa polo San Xoán ou polo solsticio de verán, aparecese reflectida no almanaque. A razón que ofrece a Xunta é, como para outras moitas, económica.

    Despois de que unha das promesas máis mediáticas de Mariano Rajoy nas pasadas eleccións xerais, o traslado dos festivos aos luns e aos venres, quedase máis ou menos aparcada, o gabinete de Feijóo optou por executar unha operación semellante, aínda que partindo da base de que "o cambio dos festivos de carácter obrigatorio é unha competencia estatal". Co campo acoutado deste xeito a Xunta aproveita que en 2013 o 6 de xanerio -día de Reis- e o 8 de decembro -día da Inmaculada- caen en domingo para asignar carácter non laborable ao San Xoán (luns) e, como é habitual, ao Día das Letras Galegas (venres). Faise "pola súa relevancia", pero tamén porque "son correlativos á fin de semana". 

    Así as cousas, queda a incógnita de se o cumprimento dos desexos dos devotos da festa das cacharelas só será efectivo en 2013 ou continuará en anos vindeiros. Mentres, o resto de festivos quedan como habitualmente, en virtude das datas establecidas polo Estado, obrigatorias e "non substituíbles", isto é, o 1 de xaneiro, Venres Santo, 1 de maio, 15 de agosto, 12 de outubro, 1 de novembro, 6 de decembro e 25 de decembro. A estes nove súmanselle dous que "poden ser substituídos polas comunidades autónomas", pero que a Xunta non varía, o Xoves Santo e o 25 de de xullo. "O 25 de xullo é substituído en varios territorios, pero non en Galicia por ser o día nacional desta comunidade", evidencia o Goberno galego.

    Cacharelas de San Xoán na Coruña © El Hematocrítico
    Campaña a prol do San Xoán festivo © A Gentalha do Pichel

  • O Goberno cede e non cobrará por pozos e traídas veciñais

    A Xunta cede. O Consello do Goberno galego deulle este xoves luz verde ao decreto que pon en marcha o novo canon da auga, un dos aspectos máis controvertidos da Lei de Augas que mesmo deu lugar á creación dunha plataforma cidadá contra a normativa. Entre as principais reivindicacións deste colectivo figuraba a esixencia de que a Consellería de Medio Ambiente renunciase ao seu proxecto de impoñerlle a nova taxa aos pozos e traídas veciñais xa que, argumentaban os afectados, carecía de sentido que o Executivo pretendese recadar por unhas infraestruturas hidráulicas en cuxa construción e mantemento non tivo nada que ver.

    Finalmente, o novo canon -que substitúe o actual canon de saneamento- deixa á marxe traídas particulares e pozos e, segundo o Goberno galego, a súa implantación non equivale a "crear ningún novo imposto", senón a facer "evolucionar os xa existentes, para emlloralos". Entre os principais cambios do novo canon hidráulico está o cambio na facturación doméstica da auga. Dende a súa entrada en vigor -a Xunta prevé que aconteza durante o verán- a factura estruturase en tramos, "segundo o consumo", tendo en conta ademais "o número de persoas por vivenda". O Executivo fai ademais especial fincapé en que o novo canon trae consigo máis equidade para defender outro dos puntos polémicos da norma: os habitantes de núcleos de poboación de menos de 2.000 habitantes, ata agora exentos de taxas, "pagarán o mesmo, independentemente de onde vivan".

    Xunto ao canon Medio Ambiente pon en marcha tameń o denominado "coeficiente de vertedura", un tributo "equivalente á taxa de depuración, actualmente xestionada polos concellos" e que se recadará nos municipios nos que as depuradoras non estean xestionadas polo goberno local, senón pola Xunta. "Permitirá iniciar novas explotacións de estacións depuradoras de augas residuais se os concellos así o solicitan", asegura a consellería.

    Manifestantes contra o canon, ante o conselleiro de Medio Ambiente © Plataforma Galega contra a Lei de Augas

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza