Varias formacións políticas e sindicatos difundiron ao longo desta fin de semana manifestos e declaracións con motivo do 25 de xullo. Esquerda Unida fíxoo este sábado en Compostela, ante a sede do Museo do Pobo Galego, baixo o título de De nós depende. A formación intregada en En Marea centrou o texto nas eleccións autonómicas previstas para ese outono, destacando que "Galicia quere saír do baleiro", destacando o proceso de "suma de forzas" iniciado hai catro anos con AGE e continuado coas mareas municipalistas e En Marea, un proceso que se quere continuar nestes novos comicios, apelando EU á "xenerosidade, intelixencia colectiva e honestidade". O manifesto péchase lembrando a "responsabilidade" que se abre de cara á posibilidade de derrotar o PP na vindeira cita electoral, un "horizonte que está aquí e agora" e que "depende de nós".
Tamén Espazo-Equo presentou o seu documento para o Día Nacional de Galicia que subliña que "nos atopamos nun novo tempo político que nos fala dunha maior participación cidadá, dun novo xeito de entender a política ligada ás demandas reais da xente e ao Ben Común" e chama a "repensar a nosa sociedade en todos os seus ámbitos: o económico, o enerxético, o laboral, o social, o territorial, o alimentario" e a "definir un horizonte de sustentabilidade ao que chegar". Alerta da "desaparición do medio ambiente das axendas políticas e mesmo do imaxinario social" e reclama construír "unha verdadeira onda verde: a xustiza social e ambiental na vertente programática e a radicalidade cidadanista no seu construtor democrático".
Pola súa banda, CCOO e UGT piden "que Galicia conte, o antes posible, cun Goberno que atenda aos problemas do país, que son precisamente os problemas dos milleiros de galegas e galegas que sofren tanto o drama do desemprego como o da pobreza laboral, o peso dos recortes ou os rigores dunha política fiscal pouco equitativa". "Galicia precisa un novo modelo produtivo, baseado nos bens e servizos de alto valor engadido. Un novo sistema con maior peso da industria e no que a competitividade se procure a través do investimento e da innovación, non dos baixos prezos e salarios", din. "Galicia necesita un cambio de políticas e de Goberno, porque os actuais responsables da Xunta probaron a súa incapacidade", conclúen as centrais sindicais.
Finalmente, o colectivo Mar de Lumes tamén difundiu un manifesto, centrado na denuncia do imperialismo en todo o mundo, sobre todo en América Latina, e que se lerá este 25 de xullo, ás 16.30 horas, nas escaleiras da Alameda de Santiago de Compostela. O texto quere expresar o apoio "ás dignas causas dos pobos da Nosa América, aos seus gobernos revolucionarios ou progresistas, e tamén ás organizacións de todo tipo que en Chiapas, en Oaxaca, na selva colombiana ou no territorio mapuche continúan loitando polos seus dereitos colectivos."