0 Gardados para despois

Quen fala cos irmandiños?

David LombaoDavid Lombao | @davidlombao


Despois da escisión, que? Apenas dous días despois de que o Encontro Irmandiño decidise marchar do BNG e aínda en plena treboada política, mediática e ata internáutica o partido que lidera Xosé Manuel Beiras comeza a marcarse un roteiro a seguir nos seus primeiros días de vida allea á formación frontista. A Coordinadora Nacional do EI reunirase este mércores para marcar prioridades e entre elas figura o establecemento de pautas para iniciar "contactos para a converxencia" con "todas aquelas persoas e grupos que estean polo novo referente político do nacionalismo". Pero, quen falará cos irmandiños? É unha interrogante que, a priori, busca respostas tanto fóra como dentro do propio Bloque.

No exterior do Bloque os contactos comezarán case inmediatamente e estarán protagonizados, en boa medida, por pequenas formacións de nova creación e tamén por outras xa existentes, como a plataforma Causa Galiza. Constituída como unha "iniciativa popular pola autodeterminación", Causa Galiza vén funcionando dende 2008 coa vontade de aglutinar colectivos e persoas do ámbito do soberanismo. Tras a asemblea dos irmandiños, esta formación "aplaudiu" a decisión da formación que encabeza Beiras e a súa vontade de "constituír unha nova fronte ampla" no ámbito do nacionalismo e da esquerda. "Á vista das resolucións, Causa Galiza abre conversas formais con esta formación para explorar o proceso de definición do novo referente político da esquerda soberanista", anunciaban.

No que atinxe a formacións de nova creación os primeiros en pronunciarse foron os compoñentes do Espazo Ecogaleguista, impulsado por "medio cento" de persoas que, din, apostan pola creación dun "referente da esquerda renovadora e ecosocialista para traballar a prol da unidade dunha esquerda nacional ampla". Un dos seus impulsores, Xoán Hermida, acolle de xeito "moi positivo" a "resolución do Encontro Irmandiño" por ir "na liña de construír algo novo" e por iso, afirma, abre a porta a contactar co partido unha vez que marchou do BNG.

En opinión de Hermida falar de "que o sistema político galego é pechado" ás tres actuais forzas parlamentarias constitúe "unha herdanza do fraguismo, un modelo que tiña como unha das súas características a anorexia política", para que Galicia "se identificase cunha comunidade como Murcia" e non "con Euskadi e Catalunya, onde hai seis partidos e non pasa nada". Desde o seu punto de vista, "os dous partidos que concentraron toda a esquerda en Galicia "a mosan "carencias e faltas de alternativas" que "levan a unha situación moi cómoda para o PP, salvo en casos de emerxencia nacional, como o Prestige". "O PP -conclúe- faise o dono dunha autonomía na que non cre".

Á espera de Máis Galiza

Se ben estes contactos con forzas e persoas alleas ao BNG se poden iniciar de maneira máis ou menos inmediata, a dimensión desa eventual "novo referente" poderá ser calibrada con máis exactitude despois do 11 de marzo, xornada na que Máis Galiza celebrará a súa asemblea nacional para, oficialmente, aborar "un debate de fondo e sereno" e avanzar "no reforzamento organizativo". Oficiosamente estará sobre a mesa a permanencia ou non no Bloque. Non en van, o propio líder da corrente, Carlos Aymerich, ten asegurado nos últimos días que, na súa opinión, "temos que pensar moito no nacionalismo galego, como nos organizamos, e seguramente as fórmulas actuais e o modelo do BNG estea xa en vías de superación".

Unha eventual marcha de Máis Galiza, xa sexa ao xeito do EI ou ben a través da petición de baixas no Bloque por parte dun continxente importante da súa militancia abriría un novo escenario para a "converxencia" que propugna o partido de Beiras. A dirección da corrente que lidera o ex portavoz parlamentario, quen vén de asumir a secretaría de economía e emprego da Executiva do Bloque, terá que ponderar as opinións da súa base, proclives á marcha especialmente entre a mocidade, e tamén se é posible conciliar o seu ideario co dos outros colectivos que apostan por confluír cos irmandiños, os cales, sobre o papel, se atopan en latitudes ideolóxicas sensiblemente afastadas.

Coa túa achega fas posible que sigamos publicando novas coma esta.

Lapelas Versión despregada

"Imos estar atentos a todos os procesos unitarios, pero dende unha definición do que debe ser a esquerda"

Rubén Pérez, coordinador local de Esquerda Unida en Vigo, afirma que "non nos gusta valorar os procesos internos doutros partidos", mais considera que "é positivo que as forzas políticas de esquerda teñan debates e catarses". Ao fío dos debates que se viñeron producindo no BNG nos últimos tempos, Pérez opina que "non hai que discutir por postos, senón que o que hai que discutir é se o proxecto é o dunha esquerda plural ou se o proxecto é o dun nacionalismo no que poden entrar outras ideoloxías".

Para o líder de Esquerda Unida en Vigo, os conflitos internos do Bloque "afectan á esquerda social, porque o BNG ten moitos militantes que obviamente tamén traballan no tecido asociativo, e a súa situación actual pode debilitar este tecido asociativo galego". Rubén Pérez conclúe que "imos estar atentos a todos os procesos unitarios da esquerda galega, pero dende unha definición clásica do que debe ser a esquerda organizada".

O PNG defende a "definición" do seu proxecto e ábrese ás alianzas

O Partido Nacionalista Galego culminará, "previsiblemente, o 17 de marzo", a marcha do BNG e dende a cúpula desta formación comézase a albiscar o panorama alleo á formación frontista. O secretario xeral do PNG, Xosé Mosquera, asegura que non se deixarán levar "pola inmediatez" e que exploran o terreo dende dúas perspectivas: a "político-ideolóxica" e a "organizativa", partindo da base de que eles viñeron estando situados nun dos "estremos" do Bloque, por movérense "nos parámetros do liberalismo social e da socialdemocracia".

Neste sentido, Mosquera ve difícil a converxencia con "moitos dos proxectos" que están saíndo do BNG, isto é, do Encontro Irmandiño. "Realmente, o seu proxecto político e ideolóxico non difire moito do que está dentro". Mentres, coida que "unha posible confluencia fóra" si que podería existir "cunha parte importante de Máis Galiza", xa que, "cando se articulou" esta corrente, moitos dos seus integrantes "defendían un proxecto bastante próximo ao noso".

O secretario xeral do PNG subliña tamén que a construción dunha nova forza implicaría, pola súa banda, a "discrepancia" do "sistema asembleario do BNG". "O noso é un sistema de estrutura partidaria, con órganos deliberativos e executivos". Nesta liña, Mosquera asegura ser tamén consciente da existencia de "movementos" para a creación dunha formación situada no "centro galeguista". "Iso anda por aí", aínda que, advirte, "non podemos facer tantos proxectos como grupos de galegos hai, haise que ir organizando para ver cales son os límites", conclúe.