Máis dun cento de persoas chegadas de toda Galicia participaron ao longo do sábado na xornada Hai Mareas, organizada por Ourense en Común. Representantes municipais, integrantes de mareas locais e activistas interviron en mesas de traballo e palestras, compartindo ferramentas, metodoloxías e experiencias co obxectivo de “mirar cara ao 2019 desde a boa praxe na xestión municipal, tomando os exemplos de Coruña ou Compostela, que están poñendo os concellos ao servizo da cidadanía”. Así mesmo, fíxose un chamamento a “abrir máis aínda as institucións á participación cidadá”, vencellando "a vida institucional coa extitucional", e fortalecendo un “espazo común e fraterno onde as mareas camiñemos xuntas”. O encontro, no que interviron os alcaldes da Coruña ou Compostela e concelleiros de Vigo ou Ourense e deputadas de EnMarea, serviu para conformar "o xermolo para unha rede municipalista galega".
Noriega destacou a importancia de "reivindicar nestes momentos a capacidade do municipalismo e do local para poder mudar o estado das cousas"
Neste senso, o concelleiro de Ourense en Común Martiño Xosé Vázquez e o alcalde de Compostela, Martiño Noriega, abriron o encontro manifestando a “necesidade de compartir estes espazos de reflexión, debate e traballo” para “aprender e reivindicar xuntas a capacidade do municipalismo na transformación da autonomía social e local”. Vázquez salientou que "hoxe Ourense convértese na capital galega do municipalismo. Queremos demostrar que outra forma de facer política é posible e que no ano 2019 Ourense poderá aprobar os seus orzamentos en tempo e forma, poderá ter unha renda social básica, poderá ter un PXOM e moitas máis cousas que os que se denominan 'bos xestores' non están sendo quen de facer hoxe".
Mentres, Noriega destacou a importancia de "reivindicar nestes momentos a capacidade do municipalismo e do local para poder mudar o estado das cousas nun momento no que os propios poderes fácticos do Estado entenden que se quedan espazos de transformación é no local, e de aí a intervención en Madrid, dinamitando a autonomía municipal e dinamitando as boas praxes das candidaturas cidadanistas e de unidade popular".
“É preciso máis e mellor municipalismo, porque merecemos limpar as institucións de ladróns, corruptos, acosadores, e podemos facelo”, salientaron
No peche da xornada, o alcalde coruñés Xulio Ferreiro, e a concelleira de Ourense en Común Ledicia Piñeiro, concluíron que “é preciso máis e mellor municipalismo, porque merecemos limpar as institucións de ladróns, corruptos, acosadores, e podemos facelo” e criticaron "o nefasto goberno de Jesús Vázquez na alcaldía de Ourense, unha cidade paralizada".
