0 Gardados para despois

A Xunta advirte de que non permitirá que se "paralicen" os xulgados se hai folga indefinida

Redacción | @prazapublica

A Xunta intentará un acordo para evitar a folga indefinida que o persoal da Administración de Xustiza en Galicia convocou a partir do vindeiro 7 de febreiro pero, no caso de que siga adiante, activará medidas para evitar a "paralización" dos xulgados, un temor real ante a unanimidade nas reivindicacións dos traballadores. Así o asegurou este xoves o vicepresidente e responsable autonómico do departamento de Xustiza, Alfonso Rueda, logo do Consello que presidiu pola ausencia de Alberto Núñez Feijóo. 

Rueda advirte de que intentará evitar a folga pero que, no caso de habela, establecerá medidas para evitar a "paralización" dos xulgados

Malia non querer entrar a valorar o fracaso da negociación que este mércores que acabou nun peche do comité de folga, Rueda aclarou que se tivese que "interpretar" a actitude dos portavoces sindicais, "habería que pensar que a folga é inevitable", pero quixo ser optimista sobre a posible resolución do conflito. Ademais, negou as acusacións dos traballadores de Xustiza, que denuncian que Xunta presentou unha proposta "empeorada". 

En contra do que asegura o comité de folga, Rueda reafírmase en que tres das cinco reivindicacións dos traballadores xa están "solucionadas": a que ten que ver consolidación de emprego, as amortizacións e a compensación pola cobertura do posto dun compañeiro. Segundo di, quedarían por arranxar a "igualdade de trato" que reclaman os funcionarios cos compañeiros que non dependente da Xunta en canto ás baixas por incapacidade temporal, así como a suba salarial a través do complemento autonómico transitorio. 

Rueda insiste en que tres das cinco reivindicacións dos traballadores xa están "solucionadas", algo que nega o comité de folga

Quedarían pendentes as reivindicacións de "igualdade de trato" co resto de funcionarios xudiciais (que non dependen da Administración galega) nas baixas por incapacidade temporal e unha suba a través do complemento autonómico transitorio. Rueda insiste en que a proposta da Xunta situaría os traballadores "por riba da media estatal" e cunha "mellora substancial". Ademais, aclara que "aínda se pode negociar" sobre ela, pero advirte de que non se poderá asumir "unha suba de 3.000 euros [anuais] por funcionario". Desde o comité de folga aseguran que a súa situación "non é comparable" ás dos compañeiros do resto do Estado porque eles sufriron recortes durante catro anos. 

Rueda asegura que esa suba de 3.000 euros "foi a última que fixeron". "E a nosa negativa motivou que se levantasen da mesa", dixo, tras garantir que, no caso de haber folga e ao determinarse os servizos mínimos, "a Xunta activará medidas para que se proporcione non un servizo normal pero si que evite que se paralice a administración xudicial".

"A Xunta activará medidas para que se proporcione non un servizo normal pero si que evite que se paralice a administración xudicial"

"É a nosa obriga e farémolo, pero esperemos que non faga falta porque aínda quedan uns cantos días para arranxar a situación", engadiu, tras aclarar que "non se trata de quen convoque a quen", senón de que as negociacións sigan "abertas". "Creo que aínda temos posibilidades e que os sindicatos saben que é factible chegar a un acordo", insistiu.

 

Subas aplicables en 2019

A Xunta difundiu unha proposta que suporía un incremento retributivo de 75 euros ao mes (900 euros anuais) para os xestores; 62 euros ao mes (744 anuais) para os tramitadores; e 55 euros ao mes (660 anuais) para os auxilios. O incremento tería efectos a partir do 1 de xaneiro de 2019 e aplicaríase en tres anualidades e o comité de folga asegura que na anterior proposta, este aumento aplicaríase desde este mesmo ano. 

Segundo o Goberno galego, a proposta recolle que este aumento no complemento é compatible con manter o concepto retributivo de IPC galego.

Respecto das baixas laborais e a "discriminación" polo desconto salarial con respecto a outros funcionarios xudiciais, a Xunta di comprometerse a crear un grupo de traballo para tratar a ampliación de supostos previstos. En canto á equiparación no salario ao substituír compañeiros, a creación de novas prazas fixas ou a estabilización laboral, a Xunta insiste en que xa houbo acordo, algo que negan os sindicatos. 

Coa túa achega fas posible que sigamos publicando novas coma esta.

O PPdeG cuestiona o "interese" do persoal da xustiza en folga "pola igualdade e a violencia de xénero"

A viceportavoz do grupo do PP no Parlamento, Paula Prado, criticou este xoves “a actitude que está a ter o comité de folga do persoal de Xustiza ao centrar unicamente as súas demandas nunha suba salarial do 12 ao 16 %, totalmente inasumible para a Xunta, e facendo caso omiso das novas propostas postas enriba da mesa de negociación, como a ampliación do permiso de paternidade e maternidade, ou as melloras en materia de violencia de xénero”.

Nunhas duras declaracións, Prado destacou a "vontade de negociación" do Goberno galego e lamentou que a resposta do comité de folga sexa "o peche nas dependencias da Xunta e o desprezo a importantes medidas en materia de conciliación ou violencia de xénero”.

Paula Prado acusa o comité de folga de rexeitar medidas de conciliación pola "escasa presenza de mulleres" entre os seus membros

Prado aínda foi máis aló e asegurou que "a única explicación que se pode dar ao desinterese por estas novas propostas sobre conciliación e violencia de xénero é a alarmante escasa presenza de mulleres entre os membros do comité de folga, polo que demandamos un pouco de coherencia e aceptar unhas medidas que situarían aos funcionarios da Xustiza de Galicia coa posibilidade de gozar do maior período de conciliación familiar retribuída de toda España”, destacou. 

Entre as medidas de mellora neste ámbito, a Xunta fala da creación de sete prazas de psicólogo para os servizos de atención ás vítimas existentes nas sete cidades galegas e o reforzo de persoal nos xulgados de violencia sobre a muller naqueles casos nos que sexa necesario pola súa carga de traballo. 

Así, Prado demandou dos sindicatos “un pouco de sensibilidade e de mesura nas súas demandas salariais, xa que a recuperación
económica que con esforzo conseguimos entre todos en Galicia non é escusa para pedir incrementos retributivos moi por riba do que a
Xunta pode asumir”. “Creo que a suba salarial que oferta a Xunta é significativa e situaría os funcionarios galegos ao mesmo nivel ou por
riba da media estatal, cun incremento dos ingresos de entre 660 a 900 euros ao ano”, insistiu.