Carmen Montón dimite. A ministra de Sanidade, Consumo e Benestar Social anunciou no serán deste martes a súa renuncia polas irregularidades do seu máster en estudos de xénero da Universidade Rei Juan Carlos, reveladas por eldiario.es. A política valenciana marcha despois de resistirse e tratar de defenderse asegurando que non todos os casos son "iguais", nunha referencia a Cristina Cifuentes e Pablo Casado. Moncloa xa anunciou que a súa substituta será María Luisa Carcedo, ata o de agora Comisionada para a loita contra a pobreza infantil.
A renuncia prodúcese a mesma tarde na que o presidente do Goberno, Pedro Sánchez, saíu en defensa de Montón asegurando que "está a facer un gran traballo e vaino a seguir facendo"
A renuncia produciuse a mesma tarde na que o presidente do Goberno central, Pedro Sánchez, saíu en defensa de Montón asegurando que "está a facer un gran traballo e vaino a seguir facendo". O cambio de estratexia en Moncloa prodúcese despois de transcender que a ministra copiou parte do seu traballo de fin de máster (TFM) da Wikipedia e de artigos atopados en internet. O contido do seu TFM, avanzado pola Sexta, e ao que tivo acceso eldiario.es, revela o motivo polo que Montón se negou en todo momento a distribuír ese documento, a pesar das peticións dos xornalistas.
Nas horas previas ao desenlace, Montón tentou descargar a responsabilidade das irregularidades do seu máster na universidade. Pero as explicacións da ministra non foron do todo convincentes para unha parte relevante do Goberno e do PSOE. A pesar de que Moncloa asegurou inicialmente que as súas explicacións foron "claras, amplas e transparentes", no círculo de Pedro Sánchez vían a situación insostible. A revelación de que as súas notas foron manipuladas despois de que rematase o máster aumentaron a súa debilidade.
A ministra socialista optou por presentar a súa dimisión un día despois de que eldiario.es publicase a información sobre as irregularidades do seu máster e tras asegurar que contaba co apoio do presidente.
O cambio de estratexia en Moncloa prodúcese despois de coñecerse que a ministra copiou parte do seu traballo de fin de máster (TFM) da Wikipedia e de artigos atopados en internet
Montón superou cunha nota media de 8,43 un Máster en Estudos Interdisciplinares de Xénero na universidade pública Rei Juan Carlos no curso 2010/2011, a pesar de que o comezou cando a metade das materias xa finalizaran. Entón era deputada e portavoz de Igualdade do PSOE. Nas súas explicacións públicas ante os medios, a política valenciana asegurou que cursara os estudos a distancia, a pesar de que ese máster era exclusivamente presencial. Ademais, as súas notas foron manipuladas despois de que o máster concluíse.
Trátase da segunda dimisión no Goberno de Pedro Sánchez en tres meses de xestión. O pasado 13 de xuño Màxim Huerta dimitiu como ministro pola polémica da súa fraude con Facenda, poucos días despois de tomar posesión do seu cargo.
