Gonzalo Caballero foi proclamado oficialmente este domingo como candidato do PSdeG á presidencia da Xunta nas vindeiras eleccións autonómicas. O secretario xeral advertiu a Feijóo que pode convocar estes comicios "cando queira" porque os socialistas galegos están "preparados para asumir o cambio".
Caballero reivindicouse e reivindicou o seu partido nun acto en Compostela no que estivo arroupado polo ex-presidente da Xunta Emilio Pérez Touriño e pola ministra de Traballo, Migracións e Seguridade Social, Magdalena Valerio, entre outros cargos. O líder do PSdeG dixo estar "convencido" de que a súa formación é "a mellor casa" que Galicia pode ter "para construír unha sociedade máis xusta e próspera" porque, aclarou, "Galicia merece un cambio".
Acto de proclamación de Gonzalo Caballero como candidato do PSdeG á Xunta / CC BY-SA-NC PSdeG
Caballero reta o PP a convocar eleccións "cando queira": "O tempo de Feijóo está a chegar á súa fin"
"O tempo de Feijóo está a chegar á súa fin", engadiu Caballero, tras asegurar confiado oque, no caso de que hoxe se celebrasen eleccións, "non habería maiorías e Feijóo non sería presidente".
Ademais, a ministra de Traballo advertiu a Caballero que "ten todas as bases sentadas para ser o próximo presidente" da Xunta. "Quero vir á túa toma de posesión, en todo caso como compañeira e amiga. Pero se é como ministra, mellor", rematou.