Funcionou a máquina do chamado sector crítico do PSdeG. Movéronse as pezas e hai candidatura alternativa a Manuel 'Pachi' Vázquez á secretaría xeral dos socialistas galegos. Será Elena Espinosa, exministra con José Luis Rodríguez Zapatero, a elixida por ese polo disconforme coa dirección actual para abrir as fiestras da formación e deixar entrar ese cambio ao que aspiran moitos membros da mesma. A nova confirmouna Europa Press con fontes internas da formación. Espinosa, política cun perfil baixo en Galicia, toma a palabra e deberá explicar por que a súa é mellor candidatura que a de Vázquez.
Como indicou Praza, esta é, en todo caso, unha operación a dous tempos. O primeiro é o propio Congreso Nacional, no cal concorrerán dúas persoas: Pachi Vázquez e Elena Espinosa. Aínda que a persoa elixida polos críticos -neste caso a exministra- non lograse o cargo que actualmente desempeña Vázquez, unha porcentaxe importante de apoios abriríalles o camiño ao segundo momento, o dunhas eleccións primarias para decidir o candidato á Xunta. Así o apuntaron a este diario fontes internas do partido, que cren que nese momento si habería claras posibilidades de formular unha alternativa ao exalcalde de cara ás próximas eleccións autonómicas.
