0 Gardados para despois

O PP saca peito tras pactar que a Xunta achegue o 3% do custo do dique flotante

David LombaoDavid Lombao | @davidlombao


Miguel PardoMiguel Pardo | @depunteirolo


No último minuto ou case no tempo engadido. Os grupos parlamentarios de PP e PSdeG pactaron a inclusión nos Orzamentos da Xunta dunha partida de cinco millóns de euros para a construción do dique flotante nos estaleiros da ría de Ferrol, un proxecto estimado en 165 millóns de euros. No último día do debate dos Presupuostos, e logo de negociacións ao límite, os populares aceptaron este acordo tras unha emenda socialista aos fondos do Igape a partir da cal a dereita negociou.

Méndez Romeu e Beatriz Sestayo, polo PSdeG, e Pedro Puy e Miguel Tellado, polo PP, levaron o peso dunhas conversas nas que tamén estiveron o BNG e AGE, que finalmente non se sumaron ao acordo e optaron pola abstención. Ambas as dúas formacións consideran escasa a achega e temen que só sirva para xustificar a inacción do PP respecto do sector naval, pero evitan votar en contra dunha partida que, aínda que mínima, vai destinada a unha infraestrutura que os traballadores e a comarca levan anos reclamando. Os cinco millóns de euros suporían un 3% dos 165 total que se calcula que costaría o proxecto. "Están a enganar á cidadanía; é unha farsa e unha cantidade ridícula", asegurou Alternativa.

O pacto non foi nada sinxelo e só ao final o PP accedeu a que a partida fose de cinco millóns e unicamente para o dique

O parto do pacto non foi nada sinxelo, xa que estivo a piques de caer nos últimos momentos. Os populares querían facer unha reserva de tres millóns de euros "para o dique flotante e outras infraestruturas navais", pero os socialistas lograron que a partida estivese cinguida unicamente ao dique e incluso incrementala aos cinco millóns. A propia Sestayo asegurou logoque espera que Feijóo chame inmediatamente a Mariano Rajoy para "acordar o financiamento conxunto e inmediato do dique flotante, unha necesidade prioritaria, urxente e básica para o presente e futuro da comarca".

E o acordo chegou, malia que o voceiro dos conservadores, Pedro Puy, asegurara o pasado luns que o seu grupo rexeitería "todas" as propostas da oposición e logo de que o conselleiro de Economía e Industria, Francisco Conde, se negase este martes a facer alusión ningunha ao naval malia a masiva manifestación do pasado domingo en Ferrol.

A polémica chegou cando a Xunta publicou unha nota na que atribuía o mérito ao Goberno galego e non ao Parlamento

Á marxe do propio pacto, a controversia chegou a un pleno que xa viña crispado dende primeiras horas da mañá cando o voceiro do BNG, Francisco Jorquera, revelou que a Consellería de Industria viña de remitirlles aos medios e de publicitar a través da web da Xunta un comunicado no que anunciaba que o Goberno galego ía destinar nos seus orzamentos a devandita partida de cinco millóns de euros "para colaborar na construción do dique flotante" ou "outras infraestrutura necesarias para garantir a viabilidade de Navantia na área de reparacións". A nota, publicada mentres a sesión parlamentaria aínda continuaba, non garantía, a xuízo da oposición, nin sequera que eses fondos fosen para o dique.

Para Jorquera, este comunicado non é máis ca un "exemplo do respecto" que os conservadores teñen polo Parlamento, máis aínda tendo en conta que "non foi a Xunta" quen decidiu darlles ese destino aos cartos, senón o propio lexislativo "a través dunha emenda" socialista "que o resto dos grupos admitimos". Pero para admitilo "esiximos que onde vostedes querían que puxese dique flotante ou outras infraestruturas, puxese só dique flotante". Tamén o voceiro de AGE, Xosé Manuel Beiras, censurou o xeito de proxecer do Goberno, se ben considera que responde á súa actitude "sistemática".

O propio Pedro Puy admitiu que o comunicado da Xunta "non responde á verdade" tras as críticas da oposición

Pola banda socialista, Abel Losada asegurou sentirse novamente "estafado" polos populares, se ben razoa que a "un partido que non condenou a ditadura franquista" lle "custa traballo distinguir o executivo do lexislativo". Neste contexto e nun clima de tensión crecente o propio voceiro do PP, Pedro Puy, admitiu que a nota enviada pola Xunta "non responde á verdade". Finalmente, o Executivo remitiu un novo comunicado, facendo referencia só ao dique flotante pero obviando, non obstante, que o investimento ten a súa orixe no Parlamento.

O PP vota en contra dunha proposta do BNG para un plan específico para o naval no Congreso

Mentres, o BNG pediu no Congreso un plan específico para o naval  que contemple a construcción do dique flotante nos estaleiros públicos de Navantia, o levantamento do veto sobre Navantia Fene, a presenza do sector na axenda exterior do Goberno para lograr contratos de buques, o desbloqueo das cuestións pendentes para poder aplicar o tax lease e a clarificación dos contratos con Pemex. O PP, incluído os deputados galegos, votou en contra.

Un mínimo pacto tras unha masiva manifestación

Algo puido ter que ver, tanto no acordo mínimo entre PSdeG e PP como na lea posterior a raíz da nota de prensa, a masiva manifestación celebrada o pasado domingo en Ferrol, onde se agardan dende hai meses respostas sobre o dique flotante ou os floteis de Pemex. Pero os meses pasan e os encargos non chegan. Unha situación dramática para toda unha cidade e unha comarca, pois do sector naval aínda dependen ao redor de 17 mil persoas. Segundo Ignacio Naveiras, voceiro do comité de empresa, nestes momentos a única actividade do estaleiro é o remate dun segundo buque para Australia. En setembro todo o cadro de persoal estará sen actividade e a industria auxiliar desaparecerá por completo.

No último ano e medio a industria auxiliar de Navantia perdeu case dous mil traballadores e a situación semella que vai continuar. A comarca de Ferrolterra ten unha taxa de paro próxima ao 30%. A construción dun dique flotante permitiría facer obras en buques de última xeración e só a súa fabricación daría emprego a unhas 900 persoas durante dous anos. O PP asegurou que o proxecto iría adiante, pero nas últimas semanas SEPI e Navantia deixaron clara a súa negativa, escudándose no rexeitamento da UE. Segundo a empresa estatal, construír esta infraestrutura iría contra as normas comunitarias, xa que as axudas estatais para o financiamento público necesario serían consideradas como ilegais pola UE. Outra promesa electoral popular son os floteis de Pémex, aínda no aire.

Coa túa achega fas posible que sigamos publicando novas coma esta.