0 Gardados para despois

Feijóo descarta cobrar máis polos medicamentos pero farao se o Estado o decide

David LombaoDavid Lombao | @davidlombao


Repagamento na prestación farmacéutica? Non, ou aínda non. Despois de lograr situarse nos principais titulares informativos do Estado ao considerar apropiado abrir o debate sobre o xeito en que se sufragan os medicamentos na sanidade pública -"probablemente o que se di aquí sexa unha nividade cando se leva a Madrid", di-, o presidente da Xunta realiza un novo equilibrio no referido á posible imposición de novos gravames. "Eu non vou poñer ningunha taxas nas receitas en Galicia", asegurou a preguntas dos xornalistas tras a xuntanza semanal do Consello da Xunta, se ben a continuación lembrou que as decisións sobre "as prestacións farmacéuticas con carácter xeral se teñen que concretar no Consello Interterritorial de Sáude -órgano que xunta ás autonomías co Ministerio de Sanidade-". Así as cousas, se o departamento que dirixe Ana Mato decide impor novas taxas, en Galicia tamén as haberá.

Non obstante, Feijóo esforzouse en matizar as palabras que vinte e catro horas deixara nunha entrevista na Cadena SER, na que abertamente apostou por un novo sistema de pagamento dos medicamentos no que "teña moito que ver a renda dos cidadáns". Sería o camiño, explicaba, para non ter que "cobrar" pola asistencia médica. Neste contexto, este xoves o presidente volveuse erixir en "firme defensor da equidade na prestación farmáceutica" e, en xeral, da sanidade pública. "Temos que preservar o Servizo Galego de Saúde e o Sistema Nacional de Saúde da crise económica, non me gustaría ter que chegar, como chegou Portugal, a cobrar vinte euros por unha urxencia". Por iso, di, considera "sorprendente" que dende as filas do PSOE e do PSdeG se critiquen medidas como a adoptada polo presidente da Generalitat de Catalunya, Artur Mas, que vén de impor o pagamento adicional de un euro por cada receita.

Nesta liña, Feijóo lembra que o ex conseller catalán de Economía, o socialista Antoni Castells, "bastante sensato", propuxo "o copagamento" en diversas ocasións no seo do Consello de Política Fiscal e Financeira. Non obstante, sinalou Feijóo mudando de idioma ao castelán ante a presenza de televisións de ámbito estatal, "se queren vostedes ter o maior copagamento que se fixo en España" cómpre lembrar que se lles "dixo aos españois que temos que traballar dous anos máis para xubilarnos aos 67 anos". "Iso si que son copagamentos", subliña, en referencia ás decisións adoptadas polo gabinete de José Luis Rodríguez Zapatero.

Plataforma loxística do Sergas

A nova plataforma loxística do Sergas, con xestión privada, foi adxudicada en outubro pero introduciuse cun informe no Consello deste xoves

Situado xa como un dos protagonistas do debate sanitario no conxunto do Estado o presidente da Xunta detívose na súa comparecencia semanal a explicar as características da nova plataforma loxística do Sergas, unha nave de 11.000 metros cadrados que se comezará a construír neste mes no Concello de Negreira e dende a que se distribuirá o material que empregan todos os centros sanitarios de Galicia. Se ben o Consello da Xunta non tomou este xoves ningunha decisión nova ao respecto desta plataforma, o Goberno galego inseriuna na orde do día pola vía do informe, unha figura sen valor legal que lle permite ao presidente abordar os temas que considera oportunos na súa comparecencia ante a prensa.

Deste xeito, Feijóo introduce a explicación deste novo sistema de abastecemento do Sergas sinalando que foi aprobado porque "acreditamos na viabilidade" da sanidade pública, "cremos nisto, xogámonos moito" e "non hai máis fórmulas ca ser eficiente". Nesta liña, Feijóo asegura que os 88 millóns de euros que se invisten na nova plataforma permiten aforrar uns 200, que serán reinvestidos na sanidade mentres os cidadáns seguen "recibindo o mesmo servizo por menos custe". Fronte á detallada explicación do seu funcionamento, ante os xornalistas o presidente obviou o feito de que a plataforma loxística terá xestión privada e que xa foi adxudicada o pasado mes de outubro. Nomeadamente, encargarase dela a empresa Servicio Móvil, con sede nas Pontes, que vén traballando en diversos centros hospitalarios ofrecendo servizos como a xestión de arquivos clínicos.

Coa túa achega fas posible que sigamos publicando novas coma esta.

Lapelas Versión despregada

Cobrarlles máis impostos ás rendas altas? Rajoy xa subiu o IRPF

Aínda entre a resaca mediática do debate de política xeral o presidente da Xunta puxo sobre a mesa este xoves un novo argumento para rexeitar a suba de impostos ás rendas máis altas, lanzada nese debate tanto polo PSdeG como polo BNG. Segundo Feijóo cumpría botar por terra as dúas iniciativas -consistentes esencialmente en incrementar o IRPF para as rendas a partir de 60.000 euros, no caso socialista, e de 100.000, no caso nacionalista- porque "neste momento xa hai un incremento do imposto da renda", o aplicado dende o Goberno central.

"Hai moitos galegos que xa pagan máis no IRPF e xa o notaron na súa nómina", polo tanto, o presidente non comparte "a proposta de que na comunidade se suba aínda máis, cando creo que podemos aguantar sen subir os impostos outra vez". En todo caso, considera "difícil" que haxa "organizacións" -en referencia ás forzas parlamentarias da oposición- que "queren seguir subindo os impostos" e "simultaneamente critican que xa se subisen". Noutras autonomías "están pagando máis impostos ca os galegos" polo que "non é unha mala noticia que en Galicia tentemos conter as esixencias tributarias e fiscais". "Non me importa que me critiquen por iso", conclúe.

Pachi Vázquez: "Feijóo decidiu que haxa dúas Galicias, a dos que poden pagar e a dos que non"

A colocación do presidente da Xunta como referencia dos partidarios do PP no que atinxe á posible imposición do repagamento farmacéutico suscitou un forte rexeitamento entre as forzas da oposición parlamentaria. No marco da súa Executiva Nacional o secretario xeral dos socialistas, Pachi Vázquez, situou a loita contra estas medidas como un dos principais obxectivos da formación. Na súa opinión, Feijóo xa decidiu que debe haber "dúas Galicias, a dos que poden pagar a sanidade, a educación e os servizos sociais" e a das persoas que non o poden facer.

Mentres, dende o BNG, a súa vicevoceira parlamentaria, Ana Luisa Bouza, tamén encargada da área sanitaria do grupo parlamentario, anunciaba este venres a presentación dunha interpelación no Parlamento que obrigará a conselleira de Sanidade, Rocío Mosquera, a posicionarse sobre a posible imposición de novas taxas na prestación farmacéutica e, en xeral, no Servizo Galego de Saúde. Neste sentido, Bouza lembra que "no Debate do Estado da Nación do ano 2011 foi aprobada unha proposta de resolución, de maneira unánime, para instar o Goberno galego a non introducir copagamentos na sanidade pero nos últimos meses o marco legal foi modificado para introducir esta medida pola que se implantou o cobro de 10 euros por renovación da tarxeta sanitaria", exemplifica.

Ante a Executiva Nacional do PSdeG Pachi Vázquez insta a dirección do seu partido a priorizar o rexeitamento as medidas de copagamento sanitario que poida impoñer a Xunta.

CC BY-SA Praza Pública