Compromiso por Galicia desenvolverá as actividades correspondentes ao día 25 de xullo, Día da Patria Galega, no parque de San Domingos de Bonaval de Santiago de Compostela, e que terá como elemento central, ás 13 horas, un acto político que contará coa intervención do Secretario Xeral da organización galeguista, Xoán Bascuas. Entre o programa de actividades destaca tamén unha ofrenda floral no Panteón de Galegos Ilustres ás 12 horas e xa na sesión de tarde o concerto de Os Perucos e Narf, ademais do monólogo de Evaristo Calvo. Igualmente desenvolverase un xantar de confraternidade e no que haberá habilitada unha zona infantil.
Segundo Xoán Bascuas, o lema deste Día Nacional de Galicia quere transmitir “que o futuro pasa polos homes e mulleres comprometidos e comprometidas co seu país, que traballan arreo para sacalo adiante e que defenden o seu autogoberno e queren uns servizos sociais á altura dos mellores de Europa”. Bascuas indica que “esa é cidadanía que debe protagonizar este día, que quere conmemorar unha xornada festiva e sempre reivindicativa como é o noso Día da Patria co orgullo de ser galegos e galegas”.
