Os primeiros resultados oficiais de escrutinio de voto das eleccións ao Parlamento Europeo deste domingo comezarán a coñecerse a partir das 23 horas, pero as primeiras estimacións de participación apuntan a un mantemento dos elevados datos de abstención rexistrados nos comicios de 2009. A participación final roldará o 44%, unha cifra aceptable para o Partido Popular, "unha boa nova que lexitima o resultado", e todo o contrario para AGE e BNG, que nas súas primeiras manifestacións públicas, unha vez pechados os colexios electorais, culparon precisamente os populares desta "baixa participación". Pola súa banda, o PSdeG anunciou que denunciará "irregularidades" e "carretaxe de votos" ante a Xunta Electoral de Lugo.
Rueda amosou a "satisfacción" do seu partido por que a participación final se manteña nas cifras de 2009, e porque non se concrete a "baixada histórica" que auguraban algunhas enquisas
Alfonso Rueda, número dous do PPdeG, amosou a "satisfacción" do seu partido por que a participación final se manteña nas cifras de 2009, e porque non se concrete a "baixada histórica" que auguraban algunhas enquisas. "É unha boa nova que lexitima o resultado que se produza, sexa o que sexa", enfadiu Rueda.
Pola contra, Martiño Noriega, un dos coordinadores de campaña de AGE en Europa, lamentou "a baixa participación", que considerou “unha decepción e non deixa de ser un triunfo do sistema e, polo tanto, do bipartidismo, que durante toda a campaña evitou falar dos problemas reais e de como as políticas europeas afectan de xeito directo no día a día da cidadanía”. Noriega sinalou que "é preciso esperar a coñecer os datos do reconto" para comprobar se “a mobilización da esquerda consciente e agredida que si se percibiu nos diferentes actos organizados por AGEe consegue dar un golpe de morte ao bipartidismo e dar entrada a todos aqueles que estamos a ofrecer un modelo alternativo centrado nos dereitos das persoas”.
De igual xeito, o secretario de organización do BNG, Bieito Lobeira, considerou que o Partido Popular e o PSOE teñen unha "responsabilidade política evidente" na baixa participación destas eleccións ao Parlamento Europeo, debido, en concreto os populares, a que estiveron "empeñados" en imprimir un "perfil baixo" á campaña. Lobeira destacou así mesmo que se pode "afirmar que o BNG gañou" debido ao labor da militancia durante as últimas semanas, á que recoñeceu "o seu traballo" fronte a un "intento de criminalización e silenciamiento" por parte dos medios de comunicación de titularidade pública.
O PSdeG "con toda seguridade" denunciará ante a Xunta Electoral irregularidades na provincia de Lugo
Pola súa banda, a secretaria de Organización do PSdeG, Pilar Cancela, anunciou que o PSdeG "con toda seguridade" denunciará ante a Xunta Electoral irregularidades na provincia de Lugo, onde supostamente apareceron sobres con papeletas do Partido Popular previamente introducidas no seu interios, así como "carretaxe de votos" en varios colexios.
