Varios alcaldes denuncian gastos innecesarios de milleiros de euros no proxecto turístico 'Portas de Galicia'

Concellos que participan en 'Portas de Galicia' Dominio Público Praza Pública

Portas de Galicia é un proxecto de promoción turística dos concellos do sur da provincia de Ourense, que naceu en 2010 por impulso da secretaria xeral de Turismo, a verinense Carmen Pardo, e do daquela responsable da materia no Goberno central, Joan Mesquida. Á iniciativa sumáronse doce concellos: Castrelo do Val, A Mezquita (gobernados polo PSOE), Cualedro, Monterrei, Laza e Oímbra (con alcaldes do PP do sector afín a Baltar) e Vilariño de Conso, Viana do Bolo, Riós, Verín, A Gudiña e Vilardevós (do PP, próximos a Núñez Feijoo).

O proxecto ten un orzamento total de 2,5 millóns de euros, achegados a partes iguais por Turespaña, a Xunta e os Concellos. Unha entidade de pequeno tamaño, como Castrelo do Val, con pouco máis de mil habitantes, ten que achegar por exemplo 14 mil euros, repartidos en catro anualidades. O obxectivo é poñer en valor e difundir os atractivos turísticos das comarcas de Monterrei e Conso-Frieiras, tanto naturais, paisaxísticas, monumentais, gastronómicas ou etnográficas. Até aquí todo ben. Porén, os gastos efectuados até o momento polo plan, e os escasos resultados acadados en ano e medio de actividade, fan que algúns dos concellos participantes comecen a expresar o seu descontento.

No 2011 gastáronse máis de 300 mil euros, e en 2012 está previsto desembolsar ao redor de 900 mil, a meirande parte en estudos técnicos, merchandising ou presenza en feiras turísticas

É o caso de Castrelo do Val, gobernado polo socialista Vicente Gómez, que xa manifestou o seu malestar hai un par de meses, e que na xuntanza que Portas de Galicia celebrará este luns, criticará boa parte dos gastos efectuados e da xestión realizada. No 2011 gastáronse máis de 300 mil euros, e en 2012 está previsto desembolsar ao redor de 900 mil, a meirande parte en estudos técnicos, plans de eficiencia, unha páxina web cun custe de 20 mil euros, ou a produción de merchandising, como cuncas de cerámica (11 mil euros), bolsas e libretas (21 mil euros), pen-drive (21 mil euros) ou presenza en feiras turísticas.

O alcalde da Mezquita, tamén gobernada polo PSOE, está igualmente entre os descontentos pola situación. E a esta posición poderían unirse outros catro concellos, liderador por edís do Partido Popular, pero baltaristas, que polo de agora limitaron as súas críticas ao ámbito privado.

Concellos que participan en 'Portas de Galicia' Dominio Público Praza Pública
Captura da web do plan, que custou uns vinte mil euros Dominio Público Praza Pública

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.