0 Gardados para despois

Xuízo aos mariscadores

Centos de cidadáns en máis de corenta embarcacións foron quen de parar en tres ocasións (7, 8 e 29 de maio de 2007) os gaseiros que pretendían deixar a súa carga na planta de Reganosa, en Mugardos, que estaba a piques de entrar en funcionamento. A policía empregouse con dureza e chegou a pechar o peirao de Ferrol para impedir as accións. Finalmente, sesenta mariñeiros, entre as moitas persoas que participaron, foron acusados "de desordes públicas, desobediencia grave á autoridade e coaccións graves". O xoves 22 de marzo, cinco anos despois, iníciase o xuízo contra oito mariscadores nos que a Fiscalía concentrou as acusacións.

Os mariñeiros, fronte ao barco

As testemuñas da defensa inciden en que a protesta contra os gaseiros foi dirixida polo Comité Cidadán

O xuízo contra os mariscadores de Ferrol quedou listo para sentencia, coa retirada dos cargos para un deles e a rebaixa da pena solicitada para o resto. Na segunda xornada do xuízo (a terceira suspendeude, ao retirar a defensa varias testemuñas) unha ducia de membros do Comité, entre eles Yolanda Díaz, Manuel Rodríguez Carballeira, Luz Marina Torrente ou Eliseo Zaera, lembraron que eles tamén participaron nas protestas.

Rolda de prensa ofrecida polos mariscadores acusados, o Comité Cidádán e Nemesio Barxa, avogado defensor

Os mariscadores acusados lembran que moita máis xente participou na protesta contra a entrada do gaseiro

Na primeira xornada do xuízo contra os oito mariñeiros ferroláns acusados de bloquear a entrada do Galicia Spirit en 2007, a maior parte asumiu a súa participación nas mobilizacións, pero negaron que os actos estivesen liderados pola Confraría e sinalaron que moita xente se manifestou no mar ese día. O xuízo continuará os días 26 e 28.