0 Gardados para despois

Teatro do Atlántico triunfa nos María Casares

Redacción | @prazapublica

"Viva o teatro, viva o público e viva María Casares!". A conclusión do presidente da Asociación de Actores e Actrices de Galicia (AAAG) no seu discurso na noite deste mércores no Teatro Rosalía da Coruña ben podería ser o resumo da gala de entrega dos vixésimos premios María Casares. Unha festa musical conducida polo grupo Chévere e cun ollo posto no centenario das Irmandades da Fala serviu para entregar os galardóns do teatro galego, nos que Teatro do Atlántico foi a compañía triunfadora da noite, con cinco recoñecementos para 'O principio de Arquímedes'.

A montaxe que chegaba á gala con máis nomeamentos foi tamén á máis premiada: mellor adaptación-tradución, mellor actos secundario, mellor actos protagonista, mellor direccción e mellor espectáculo. A continuación situouse 'Xardín suspenso', na que o Centro Dramático Galego viu recoñecido o traballo de iluminación, a escenografía e a mellor actriz protagonista para Melania Cruz, compartido ex aequo con Mela Casal pola súa interpretación en 'Noiteboa' (Redrum Teatro).

'O Furancho' (Ibuprofeno Teatro), 'Manawee' (Matrioshka Teatro), '30 e tantos ósos' (Aporía escénica), 'Ensaio sobre a cegueira' (Sarabela Teatro), 'Presidente' (Teatro do morcego), e 'FEO!' (Caramuxo Teatro) completan a nómina dunha entrega de premios á que asistiron máis de 500 persoas, entre elas representantes das institucións públicas que os apoian, caso do Concello e da Deputación da Coruña ou AGADIC. As cámaras da TVG foron testemuñas do espectáculo e tamén destinatarias de parte da intervención de Mohedano: "Pedimos que a TVG, pola súa propia saúde -dixo- dedique o máximo esforzo en esixir da profesión teatral a máxima dedicación e excelencia no seu traballo".

"Pedimos que a TVG, pola súa propia saúde -dixo- dedique o máximo esforzo en esixir da profesión teatral a máxima dedicación e excelencia no seu traballo"

A xuízo da AAAG a televisión pública "ten medios para promover" o teatro e o Centro Dramático Galego, pola súa banda, debe "esixir aos responsables da TVG a máxima dedicación e excelencia no seu traballo". Todo isto, subliña, coas dúas décadas dende o falecemento de María Casares como pano de fondo. "Como dicía María Casares, o público é o último actor do escenario; sen el, o feito teatral non existe".

A gala, dirixida por Xesús Ron (Chévere), estivo conducida por ata nove intérpretes acompañados por cinco músicos. Durante o seu desenvolvemento a xornalista Montse Dopico encargouse da lectura do Manifesto do Día Mundial do Teatro e unha representación da Revista Galega de Teatro recolleu o premio de honra Marisa Soto.

Coa túa achega fas posible que sigamos publicando novas coma esta.

Todos os premios dos XX María Casares

Mellor maquillaxe

Raquel Fidalgo, por Ensaio sobre a cegueira, de Sarabela Teatro

Mellor vestiario

Marián Bañobre, pol'O furancho, de Ibuprofeno Teatro

Mellor escenografía

Carlos Alonso, por Xardín suspenso, do Centro Dramático Galego

Mellor iluminación

Afonso Castro, por Xardín Suspenso, do Centro Dramático Galego

Mellor música orixinal

Monica de Nut, Vadzim Yukhnevich e Javi Bermejo, por Manawee, de Matrioshka Teatro

Mellor adaptación-tradución

Afonso Becerra, pol'O principio de Arquímedes, de Teatro do Atlántico

Mellor texto orixinal

Diana Mera, Merche Pérez e Teté García, por 30 e tanto ósos, de Aporía Escénica

Mellor actriz secundaria

Iolanda Muíños, por Presidente, de Teatro do Morcego

Mellor actor secundario

Alberto Rolán, pol'O Principio de Arquímedes, de Teatro do Atlántico

Mellor actriz protagonista

Mela Casal, por Noiteboa, de Redrum Teatro, e Melania Cruz por Xardín suspenso, do Centro Dramático Galego.

Mellor actor protagonista

Toni Salgado, pol'O principio de Arquímedes, de Teatro do Atlántico

Mellor dirección

Xúlio Lago, pol'O principio de Arquímedes, de Teatro Do Atlántico

Mellor espectáculo infantil

Feo!, de Caramuxo Teatro. 

Mellor espectáculo

O principio de Arquímedes, de Teatro do Atlántico