0 Gardados para despois

VÍDEO | 'Galería de saldos', primeiro tráiler dun libro galego en realidade virtual

Redacción | @prazapublica

O escritor e xornalista Diego Giráldez está de dupla estrea. Vén de lanzar o seu primeiro traballo literario, 'Galería de saldos' (Xerais, 2016), recentemente galardoado co premio Manuel Murguía, e para promocionalo estrea o que xa é o primeiro booktrailer galego en realidade virtual, que acompaña estas liñas.

O traballo audiovisual, dirixido por Antón Veiga e realizado por Mon Moares, é un vídeo que permite que o público percorra virtualmente, nunha experiencia de 360 graos, unha galería de arte na que pode "visitar e descubrir as ilustracións que acompañan os diferentes relatos do libro", obra de Iago Sánchez Losada. Tamén atoparán a portada da obra, ilustrada por Antonio Seijas.

O traballo permite percorrer virtualmente unha galería de arte coas ilustracións do libro

A realidade virtual é accesible tanto dende pantallas -táctiles ou non- como dende os novos dispositivos de realidade virtual. Así, nun computador convencional é posible desprazarse pola galería movendo o rato. Nos teléfonos de última xeración, no entanto, o paseo pódese desenvolver a través do headtracking e dos sensores espaciais.

Con este avance Giráldez quere convidar o público a achegarse á súa Galería de saldos, unha "colección de relatos curtos" nos que "personaxes moi apegados á actualidade se mesturan con obras de arte orixinais ou reproducións baratas". O libro do tamén colaborador de Praza.gal estará á venda en librarías dende o vindeiro 9 de xuño.

Booktrailer de 'Galería de Saldos'

Vídeo en 360 graos

© Antón Veiga / Mon Moares

Coa túa achega fas posible que sigamos publicando novas coma esta.