O barrio de Sar recupera a súa memoria a través de fotografías

Traballadoras da fábrica de camisas. Anos 50 © Espazo Veciñal de Sar

O Espazo Veciñal de Sar leva dous meses traballando na recollida e dixitalización de fotografías antigas desta zona de Compostela. De momento, fíxose con máis de 400 imaxes cedidas pola veciñanza, relacionadas coa vida cotiá do barrio no último século e coa propia evolución urbanística da contorna. O obxectivo final é a organización dunha exposición fotográfica con todas elas, así coma outro tipo de publicacións.

Esta semana a entidade veciñal comezará unha nova campaña de recolla, que manterá o funcionamento da anterior, procurando a máxima comodidade e seguridades para as persoas que queiran ceder as súas imaxes para este repositorio colectivo. Os bares do barrio volverán ser o lugar de recollida deste material. Alí, o equipo do Espazo Veciñal  de Sar levará un escáner e un ordenador e nuns instantes dixitalizará as fotografías, devolvéndollas de inmediatos aos seus propietarios e propietarias.

O calendario fixado para as vindeiras semanas é o seguinte, sempre en horario de 20 a 21.30: Luns 12 de decembro no bar Teré (Angrois). Martes 13 de decembro no bar O Carro (rúa Sandino). Martes 13 de decembro no bar Rincón do Gaiás (Travesía da Ponte de Sar). Xoves 15 de decembro no bar Da-Ca (Belvís). Luns 19 de decembro no bar Recobio (Cruceiro de Sar). Xoves 22 de decembro no Restautante Quitapenas (rúa de Sar). Venres 23 de decembro no bar Domínguez (rúa de Sar). Tamén ofrecen un e-mail de contacto (espazosar@gmail.com) para as persoas que non poidan achegarse a estes lugares nas datas fixadas.

O Espazo Veciñal de Sar creouse co obxectivo de revitalizar este barrio compostelán. Nos últimos meses levou a cabo distintas actividades, coma a realización dun Ciclo de Cinema de Verán ou a organización dun obradoiro de masaxe infantil para nais e pais con crianzas de 0-6 meses no Centro Sociocultural.

 

Un grupo de homes, nun bar nos anos 50 © Espazo Veciñal de Sar
Carmucha e Maruja Raposo na escola. Anos 40 © Espazo Veciñal de Sar
Veciño de Angroi coa súa vaca nos anos 50 © Espazo Veciñal de Sar

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.