Unha obra para afondar nos nomes dos lugares, os camiños e as parroquias de Lugo. A concelleira de Cultura, Turismo, Xuventude e Promoción da Lingua, Carmen Basadre, e o mestre Carlos Vázquez, presentaron este mércores no Auditorio do Vello Cárcere o libro Toponimia do Concello de Lugo, que afonda na orixe das denominacións do rueiro e das parroquias da capital provincial. Esta publicación é a tese doutoral de Vázquez e "vén encher un oco dentro da etimoloxía toponímica do municipio", ao ser "o primeiro tratado que se fai deste tipo" na localidade.
A obra afonda na orixe dos nomes do rueiro e das parroquias do Concello de Lugo
Así o asegurou Basadre na presentación da obra, na que agradeceu ao autor este esforzo "posto á disposición de todas e todos os lucenses e persoas interesadas na historia dos lugares e rúas da cidade e do rural". Pola súa banda Carlos Vázquez, nado en Monterroso, pero lucense de adopción, expresou o seu agradecemento á entidade local pola contribución feita á hora de editar este libro, froito de moitos anos de investigación.
En total, son uns 400 os topónimos de Lugo analizados polo autor, que presentou a súa tese hai tres anos na Facultade de Filoloxía de Santiago de Compostela.
