O colectivo Cultura si, mausoleo non pide a dimisión do Conselleiro de Educación e Cultura Jesús Vázquez, pola "inoperancia" e "falta de ideas" do Goberno galego sobre o que facer co recinto e polo "fracaso" que ao seu xuízo supoñen as exposicións que até o de agora se puxeron en marcha no Gaiás. Así mesmo, critica que se utilice o Códice Calixtino, que se exporá na Cidade da Cultura a partir de outubro, para ocultar eses malos resultados.

O seu portavoz, Xan Carlos Ansia, acusa a Xunta e Arcebispado de "pactar un mercadeo" co Códice, que recibe ao redor de dúas mil visitas diarias na Catedral, mentres que a exposición estrela da Cidade da Cultura, Gallaecia Petrea, é vista por apenas 300 persoas cada día. O colectivo considera que este acordo é un "intento do conselleiro de buscar visitantes para o cementerio civil no que se esta a converter a Cidade da Cultura" e denuncia que é "un autentico disparate obrigar a que os cidadáns e os peregrinos teñan que sufrir a tortura de desplazarse ao monte Gaiás". Ansia considera que "para Jesús Vázquez vale todo con tal de que a Cidade da Cultura teña visitantes, pero non é xustificable tapar a inoperancia e falta de proxectos con ideas descabeladas e fora de lugar".

O colectivo considera que este acordo é un "intento do conselleiro de buscar visitantes para o cementerio civil no que se esta a converter a Cidade da Cultura"

O colectivo afirma que "a Cidade da Cultura non serve tal e como esta proxectada, non ten visitantes, non ten contidos adecuados e supon un fraude aos cidadans intentar que perviva nos orzamentos a costa de levar aos Gaiás tesouros e riquezas que todos podemos ver no seu lugar de orixe". Conclúe que "a única solución a estes despropositos é o peche definitivo da Cidade da Cultura, a disolución da Fundación co despido de directivos, asesores e demais persoal pensante".