Modesto del Río

Unha ducia de momentos de Eurovisión

Este sábado celébrase a final de Eurovisión 2012 (aínda que os verdadeiros fans levan días pendentes das semifinais). Repasade algunhas das mellores cancións, anécdotas, personaxes e estrelas que o festival amosou nos seus máis de cincuenta anos de historia. E desta vez si que unha ducia nos quedou moi curta.

  1. 01

    Comezamos con Domenico Modugno

    O Festival de Eurovisión empezou no ano 1956. Xa nos seus comezos, en branco e negro, deu acollida a algúns artistas que acadarían éxito internacional. Por exemplo, o representante italiano en 1958: Domenico Modugno.

  2. 02

    La, la, la (etcétera)

    Na década seguinte, o número de países participantes incrementouse. Así, o réxime franquista tamén aproveitou as posibilidades de difusión europea do festival. O La, la, la gañou en 1968, interpretado por Massiel, despois de que se retirase ao seu cantante orixinal, Joan Manuel Serrat, que pretendía cantar en catalán. Tamén se di que houbo "primas a terceiros".

  3. 03

    Anticipando a Revolução dos Cravos

    Eurovisión tamén serviu para facer a revolución. Temos un caso moi perto de nós. A canción de Portugal -un país que nunca gañou Eurovisión- en 1974, E depois do adeus, de Paulo de Carvalho, converteuse nun dos contrasinais que deu paso á Revolução dos Cravos.

  4. 04

    Sweden, 12 points

    ...pero quen gañou o festival ese ano foi Suecia, cos despois famosísimos Abba e o seu Waterloo, aproveitando unha das épocas en que non era obrigatorio cantar nunha lingua oficial do país en Eurovisión.

  5. 05

    Marrocos en Eurovisión!

    Agora que tanto se critica que participen en Eurovisión países asiáticos, pouca xente lembra que Marrocos concorreu unha soa vez no festival, ao pertencer a súa televisión pública á UER. Foi un ano en que Israel foi expulsado temporalmente, ao non querer organizar o concurso por segundo ano consecutivo. Foi Samira Said, en 1980.

  6. 06

    Quien manejaba su barca?

    Se xa repasamos antes o éxito español de Massiel, tamén é xusto lembrar os seus fracasos máis sonoros. A obsesión de TVE por pretender poñer de moda en Europa os ritmos flamencos levou a mandar en 1983 a Remedios Amaya e a súa barca a Munich, obtendo cero puntos, os mesmos ca Turquía aquel ano.

  7. 07

    Estes alemáns...

    Nos anos 90 volveu ser obrigatorio cantar nunha lingua oficial do estado participante, circunstancia que aproveitou Irlanda para gañar tres anos seguidos, e outra vez máis dous anos despois. Outros concorrentes decidiron optar pola vistosidade e extravagancia, como a oferta alemá en 1998, Guildo Horn.

  8. 08

    O momento de Dana Internacional

    Pero ese 1998 foi tamén un fito no eurofestival, ao ser a primeira vez que unha transexual vencía o concurso, impulsada tamén pola afección que ten a comunidade LGBT a esta competición. Dana International gañou, e tentou repetir en 2011, sen lograr pasar da semifinal.

  9. 09

    Entran os países do leste

    Tamén nos 90 se abriu a participación aos países do leste de Europa, aínda que Iugoslavia xa levaba dende os 60 en Eurovisión grazas á súa "terceira vía". Despois de sufrir unha cruenta guerra, Bosnia e Herzegovina decidiu achegar tamén un toque kitsch no ano 2000 co seu artista nacional Laka.

  10. 10

    Tamén hai 'heavy' en Eurovisión

    Un dos países que compartía con Portugal a deshonra de levar toda a vida participando e nunca gañando era Finlandia, que por fin logrou a vitoria no ano 2006 cunha canción que rompía os moldes do concurso, o Hard rock hallelujah dos monstros de Lordi.

  11. 11

    As avoas de Eurovisión. Favoritas no 2012?

    A idade mínima para participar en Eurovisión é de 16 anos. Este ano a Federación Rusa decidiu enviar un grupo de mulleres que, aínda que non o pareza, non chegan aos 80. As Buranovskiye Babushki cantan nunha lingua minorizada, o udmurt, e espertaron as simpatías do público. Iso si: aseguran que, se gañan, cos cartos obtidos construirán unha igrexa en Buranovo.