Praza Pública

Unha ducia de capitais do Entroido galego

Se cadra sería máis correcto falarmos de entroidos galegos. A festa máis transgresora e retranqueira do ano ten tantas capitais como lugares nos que se celebra; do triángulo máxico ourensán á costa, pasando polas cidades, son días de máscaras, disfraces e personaxes que non son o que semellan ser. Velaquí un percorrido entroideiro polo país.

  1. 01

    Laza

    Os peliqueiros son os protagonistas dun dos entroidos máis senlleiros do país. Son intocables, van acompañados do son das súas chocas e advirten: quen non salte, pode acabar na taberna tendo que pagar unha volta de viños.

  2. 02

    Verín

    Preséntase como un dos "mellores Entroidos do mundo" e ten como máscara máis característica ao cigarrón, armado de látego e con ganas de festa.

  3. 03

    Xinzo

    Outro dos centros do Entroido ourensán. Alí a personaxe central é a pantalla, coa súa característica máscara.

  4. 04

    Viana do Bolo

    O rostro do entroido en Viana é o do boteiro, a máscara de madeira sorrinte e con cornos e fitas de todas as cores. Con algunhas variacións, os boteiros tamén percorren estes días as parroquias e lugares de Vilariño de Conso.

  5. 05

    Chantada

    O Entroido Ribeirao de Chantada é un dos máis ancestrais do país. Pola contorna da Ribeira Sacra andan nestes días os recuperados volantes, con puchos que chegan a superar os 15 quilos, feitos de vimbio e inzados de cores.

  6. 06

    A Pobra do Brollón

    Se te achegas ao entroido da Pobra do Brollón vas desexar e temer atoparte co Oso. O personaxe baixa do monte cuberto de peles de animais e os seus "criados" lixan sen piedade a quen se lles pon non camiño.

  7. 07

    O Fulión de Manzaneda

    Como en moitos puntos de Ourense, en Manzaneda xa se respira Entroido dende hai semanas. Pero nestes días, especialmente o Martes de Entroido, chegan as xornadas grandes: o Fulión!

  8. 08

    Comarca da Ulla

    Pola bisbarra natural da Ulla son días de correos e xenerais que, acompañados do seu exército entroideiro, se enfrontan en altos e atranques inzados de sátira sobre os asuntos máis comentados do ano en cada lugar, no país e no mundo. A súa orixe son enfrontamentos armados de finais do século XIX, como a batalla de Cacheiras ou as guerras carlistas, que derivaron en parodia.

  9. 09

    Entroido de Cobres

    Polo Cangas ou Vilaboa reina estes días a elegancia das madamas e os galáns. Música, festa e moitas cores.

  10. 10

    Pontevedra

    O programa do entroido de Pontevedra é diverso, pero todas as citas derivan nunha: a que ten protagonista ao loro Ravachol. Falecido en 1913, o paxaro fíxose famoso polos seus diálogos, non sempre moi elegantes, na botica de don Perfecto Feijóo, e o seu enterro é, ano tras ano, o fin de festa entroideiro na cidade.

     

  11. 11

    A rúa da Torre na Coruña

    Unha das citas clave do entroido coruñés está en Monte Alto e, máis concretamente, na rúa da Torre. Ese é o escenario da gran festa choqueira, que admite toda caste de disfrace sempre que leve consigo unha boa carga de retranca. Este ano disque van proliferar mitras e túnicas episcopais.

  12. 12

    Santiago

    A capital galega non ten unha tradición entroideira tan fonda como outras localidades galegas, pero si ten un protagonista que nunca o perde, o Meco, rei do entroido que representa algún dos asuntos máis polémicos do ano e que arde como fin de festa o Mércores de Cinza. Este ano seica ten a intención de facer o Entroido great again.