0 Gardados para despois

Praza Pública

Unha ducia de razóns para non perder o Festival de Cans

A parroquia porriñesa de Cans xa arrecende a cinema. E a música, e a gastronomía e a libros... Tras salvar algún obstáculo máis do previsto a organización do Festival de Cans xa o ten todo a punto para botar a andar, dende o mércores 24 ao sábado 27 de maio, a súa décimo cuarta edición. Velaquí doce petiscos dun programa que, novamente, reborda agroglamour

  • Escolma de booktrailers

    Tras a experiencia inicial de 2016 desta volta a sección de booktrailers medra en Cans para multiplicar as ligazóns entre literatura e audiovisual e "indagar no futuro das novas mesturas que, ao acubillo de internet, emerxen" para promocionar o libro e a lectura. Coa coordinación da xornalista Teresa Cuíñas proxectaranse en Cans ata 10 pezas de obras de xéneros literarios diversos

    Aníbal e a Pintora - Booktrailer

    Illa Bufarda
  • 'Recoméndoche un libro'

    Outra vía para a mestura de literatura e audiovisual. Impulsado dende a Biblioteca Neira Vilas, o IES Castelao e a Escola Oficial de Idiomas de Vigo, a iniciativa formenta a participación como a crítica a través do vídeo ou a realización de booktrailers

    Recoméndoche un libro - Paula Durán Magalón

  • 15 anos do Prestige

    Ás portas do décimo quinto aniversario do naufraxio do Prestige nas costas galegas o festival lembra aquel "punto de inflexión" na sociedade galega e a creatividade artística que xurdiu en torno a ela. Entre os traballos audiovisuais que se proxectarán destaca Mar de fondo (Daniel Guzmán), un documental gravado en 2003 e aínda inédito que verá a luz en Cans o venres 26 ás 6 da tarde. Xunto a ela, Cans revisita outros traballos como Carcamáns (Marcos Nine), Crebinsky (Enrique Otero), Man (Xosé Manuel Abraldes) ou Toxic Percebe (Xabi Jácome e Martín Fiallega).

    Toxic Percebe

    © Martín Fiallega, 2003
  • 'A historia dun satélite'

    Cans acollerá a estrea mundial do primeiro filme das Also Sisters (Sonia e Miriam Albert-Sobrino), A historia dun satélite. As realizadoras debutan na longametraxe con este traballo producido pola Universidade de Utah tras triunfaren coas súas curtas en diversos festivais internacionais.

    Tráiler d'A historia dun satélite

  • Coloquio na leira con Montxo Armendáriz

    O realizador navarro será nesta ocasión o protagonista na leira de Alicia no mediodía do sábado

  • O regreso (por un día) de Radio Océano

    O mítico grupo liderado por Xosé Manuel Pereiro (a.k.a. Johny Rotring) xuntarase de novo en Cans para recuperar algunhas das súas pezas audiovisuais e ofrecer unha "actuación exclusiva", prometen

    Radio Océano - Terra Chá

  • MiniCans

    O espazo miúdo do festival rebordará actividade durante toda a xornada do sábado: cinema, xogos, e cancións non han faltar

  • Premios e homenaxes

    Desta volta o Premio Pedigree será para Miguel de Lira, que deixará, como corresponde, a súa estrela no torreiro de Cans. Os Chimpíns de Prata serán para Jorge Coira e mais para Feliciano Bernárdez, veciño da vila. 

  • O traballo audiovisual da veciñanza

    Dende o pasado febreiro dez veciñas e veciños da aldea de Cans traballaron en documentación, guión, edición e montaxe coa coordinación do realizador Juanma Lodo. A súa creación audiovisual é unha curta documental sobre a emigración que se estreará no primeiro día do festival, o mércores 24.

  • Tapas de cinema

    Na tarde do xoves 25 o festival esténdese ata a praza do Concello do Porriño para mesturar cinema e gastronomía da mans dos cociñeiros Inéz Abril e Rafa Centeno.

  • Can Sonoro

    Un percorrido sonoro polos camiños de Cans da man de Xurxo Souto. O sábado, dende as 10 da mañá.

  • Os chimpibuses!

    Vehículo oficial do festival, emblema do agroglamour e do espírito de Cans