Menos cartos para as políticas activas de emprego, xusto nos momentos de maior desemprego en Galicia. O prognóstico da Consellería de Facenda indica que o PIB reducirase un 0,9% no próximo exercicio e que a taxa de desemprego incrementarase até o 21%, catro décimas máis da previsión que hai para o peche deste ano.
O axuste orzamentario aplicado polo Goberno central hai medio ano ás políticas activas de emprego deixaron Galicia con 140 millóns de euros menos para estas partidas, o que unido á insuficiencia do Goberno de Feijóo para conseguir novos recursos supoñen unha diminución moi importante. Así se pode comprobar nuns Orzamentos da comunidade autónoma nos que a Xunta perde catro de cada dez euros empregados o ano pasado para a creación de emprego ou a inserción laboral. Unha análise aos principais programas da Dirección Xeral de Traballo neste ámbito aclara que estes fondos descenden en algo máis do 40%.
O axuste orzamentario de Madrid e a insuficiencia da Xunta para achegar recursos confirman a forte diminución de fondos
Así, a Consellería de Traballo e Benestar destinará en 2013, segundo estes Orzamentos, uns 201 millóns de euros á promoción do emprego e ás institucións do mercado de traballo, fronte aos máis de 338 do pasado ano, o que supón unha redución de máis de 136 millóns e do -40,5%.
Os fondos nos programas de mellora e fomento da empregabilidade caen en case un 60%
Así, a maior redución de fondos chega nos programas de mellora e fomento da empregabilidade, que caen case un 60% ao pasar dos 99,8 millóns do ano 2012 aos 40,6 que se prevén para o vindeiro exercicio. En canto á intermediación e inserción laboral, a diminución da achega económica é tamén de preto do 60%, ao pasar dos 18 millóns destinados no ano pasado aos 7,3 que se dedicarán en 2013.
En canto á promoción do emprego, emprego autónomo e do mercado de traballo inclusivo, os 54 millóns de euros de fondos cos que se dispoñían no pasado ano pasarán neste vindeiro exercicio aos 43,3, o que supón un descenso de case o 20%. Algo máis (-26,7%) é a baixada na formación profesional para desempregados, que recibirá 72,5 millóns fronte aos 98,9 de 2012.
A escaseza de fondos para estas políticas activas de emprego é continuamente criticada pola oposición. Xa na primeira sesión de control do Parlamento tras as eleccións autonómicas, o líder do PSdeG, Pachi Vázquez, propuxéralle a Núñez Feijóo que incrementase os fondos para estas partidas, ademais de aumentar o investimento en innovación e unha nova fiscalidade á banca da que a Xunta tampouco quere saber nada.
Precisamente, a conselleira de Traballo e Benestar, Beatriz Mato, que repite cargo tras as eleccións, manifestara antes dos comicios que "as políticas activas de emprego non crean nin un só posto de traballo".